Qyzylordalyq ónertapqysh ámbebap qolarba jasap shyǵardy
QARMAQShY. QazAqparat - Qyzylorda oblysy Qarmaqshy aýdanynyń ortalyǵy - Josaly kentiniń turǵyny Nurtaı Jaıyqbaev úı sharýashylyǵyna arnalǵan ámbebap qolarba jasap shyǵardy, dep habarlaıdy QazAqparat tilshisi.
Ónertapqysh bul jobasynyń kópshilikke úlken paıdasy tıetinin aıtady. Onyń aıtýynsha, mundaı qolarba buryn eshbir jerde jasalmaǵan. Ámbebap qolarba jergilikti turǵyndardyń úı sharýashylyǵyndaǵy jumystaryn kóp jeńildetetin bolady. Turǵyndar atalmysh qurylǵyny paıdalaný arqyly kóptegen isterin atqaryp shyǵýyna ábden bolady. Qolarba birneshe jumysty atqaryp shyǵa alady.
«Nazar aýdarsańyz, qolarbaǵa kóptegen qosalqy bólshekter bekitilgen. Sol bólshekter kóptegen jumystardy atqarýǵa negiz bola alady. Ony qysy-jazy kádege jaratýǵa ábden bolady. Qys aılarynda atalmysh qolarbamen qar kúreı alasyń. Al arba ústin ornatylǵan aýyspaly júksalǵysh qyzmetimen taǵy da kóptegen fýnktsııany paıdalanýǵa negiz bar. Sondaı-aq, men arbanyń astyna kýltıvator bekittim. Ony kóktemgi dala jumystarynda paıdalanamyz. Ol jerdi qopsytady, aramshópti otaıdy. Qolarbada soqa da ornatylǵan. Ony jer jyrtý barysynda iske asyramyz. Aıta keterligi, qolarbada eshqandaı elektr qýaty paıdalana qoımaıdy», - dedi Nurtaı Jaıyqbaev.
Ónertapqysh Qarmaqshy aýdandyq agrarly-tehnıkalyq kolledjinde qyzmet atqarady. Arnaýly oqý ornynda «Avtomobıl, traktor qurylysy jáne oǵan tehnıkalyq qyzmet kórsetý» páninen dáris beredi. Bilikti ustaz óz shákirtterin ónertapqyshtyq qasıetterge baýlyp keledi. Arnaýly oqý ornynda N. Jaıyqbaev 2011 jyldan beri qyzmet jasaıdy. Ol shyǵarmashyl pedagogtardyń kórmesi men basqa da sharalaryna turaqty túrde qatysyp keledi. Olardyń barlyǵynda júldeli oryndardan kórinip, san alýan marapattarǵa qol jetkizdi.
Ol jasaǵan qolarba Qarmaqshy aýdanynyń 90 jyldyq mereıtoıyna oraı ótken ınjener-pedagogtardyń «Baǵdarly baıqaý-kórmesi» saıysynda joǵary baǵalandy. Endi ol oblystyq baıqaýǵa qatysatyn bolady.
