Qyzylordalyq oqýshylardyń 95 paıyzy jazǵy lagerlerde demalady
QYZYLORDA. QazAqparat - Qyzylorda oblysy boıynsha mektep bitirgeli otyrǵan 6200 túlektiń 4194-i UBT-ǵa qatysýǵa nıetti. Onyń 419-y «Altyn belgige» jáne 217-i úzdik attestatqa úmitker.
Bul týraly óńirlik kommýnıkatsııalar ortalyǵynda oblystyq bilim basqarmasy basshysynyń orynbasary Baǵdat Berdáýletov BAQ ókilderine arnalǵan baspasóz máslıhatynda aıtty, dep habarlady QazAqparat tilshisi.
Bıylǵy jyly mektep bitirýshiler úshin bitirý emtıhandary men joǵary oqý oryndaryna túsýshilerge arnalǵan jańa formattaǵy UBT synaǵy bólek ótkizilmeky. Barlyq mektep bitirýshiler orta bilim týraly attestat alý úshin mektep bazasynda qorytyndy attestattaýdan ótip, joǵary oqý oryndarynda bilim alýǵa nıettiler Ulttyq biryńǵaı testileýge qatysatyn bolady.
- Oblys boıynsha 29 mamyr men 10 maýsym aralyǵynda 11 synyptar úshin memlekettik qorytyndy attestattaý synaǵy uıymdastyrylady. 12 maýsymda mektep bitirýshilerge attestat tapsyrý saltanaty ótedi. 20 maýsym men 1 shilde aralyǵynda joǵary oqý oryndarynda oqýdy josparlaǵan, memlekettik granttan úmitti mektep bitirýshi talapkerler UBT synaǵynan ótedi. Aımaqta UBT kezinde 9 testileý pýnkti jumys jasaıdy. Qazirgi tańda barlyq pýnkt qajetti qural-jabdyqtarmen jabdyqtalǵan, - deıdi oblystyq bilim basqarmasy basshysynyń orynbasary Baǵdat Berdáýletov.
Sondaı-aq jıyn barysynda Baǵdat Berdáýletov oqýshylardyń jazǵy demalysyn uıymdastyrýdaǵy daıyndyq jumystaryn baıan etti. Onyń aıtýynsha, oblystaǵy barlyq oqýshylardyń 95 paıyzy jazǵy tynyǵý oryndarymen qamtylady. Olarǵa demalys qala syrtyndaǵy jáne oblystyq saıabaqtarda ornalasqan lagerlerde, mektep janyndaǵy kúndizgi tynyǵý lagerlerinde, tarıhı oryndarǵa, EKSPO halyqaralyq kórmesine saıahat jasaý túrinde uıymdastyrylady.
- Oblysta jalpy 9 jazǵy tynyǵý lageri bar, onyń 6-y jyl boıyna jumys jasap keledi. Jazǵy maýsymda atalǵan lagerlerde 8740 bala demalý-saýyqtyrýmen qamtylyp otyr. Onyń ishinde 4146 bala jalpyǵa mindetti oqý qory esebinen demalmaq. Bul maqsatta bıýdjette 70 mln teńge bólingen. Qalǵan balalar demeýshiler esebinen tynyǵady. Sonymen qatar, oblystan tys aımaqtarda ornalasqan lagerlerde munaı kompanııalary men basqa da kásiporyndardyń qoldaýymen jetim jáne ata-ana qamqorlyǵynsyz qalǵan, kópbalaly, turmysy tómen, múmkindigi shekteýli otbasylardan shyqqan 13210 balanyń demalýyna jaǵdaı jasalyp otyr, - deıdi basqarma basshysynyń orynbasary.
