Qyzylordalyq oqýshylar sıngapýrlyqtardy TIMSS qorytyndysy boıynsha artta qaldyrdy
ASTANA. QazAqparat - Sońǵy TIMSS qorytyndysy boıynsha Qyzylorda oblysynyń 8-synyp oqýshylary álem reıtıngisinde aldyńǵy qatarda turǵan Sıngapýrdan da joǵary kórsetkishke qol jetkizdi.
Oblystyq bilim basqarmasynyń málimetinshe, baıqaýǵa Qyzylorda oblysynan 13 mektepten (7 qazaq tilinde oqytatyn jáne 6 aralas) 857 oqýshy qatysty.
Orys tilinde oqıtyn Qyzylorda, Jambyl, Aqtóbe oblystarynyń 4-synyp oqýshylary jalpy reıtıngte úzdik 5 memlekettiń kórsetkishterimen salystyrmaly jáne odan da joǵary nátıjelerdi kórsetti.
Esterińizge sala keteıik, halyqaralyq matematıka jáne jaratylystaný pánderi boıynsha bilim berý sapasyna halyqaralyq monıtorıng júrgizetin TIMSS (aǵylsh. TIMSS - Trends in Mathematics and Science Study) zertteýi Halyqaralyq IEA bilim berý jetistikterin baǵalaý qaýymdastyǵynyń uıymdastyrǵan baǵdarlamasy bolyp tabylady. Bul zertteý 4-synyp oqýshylary men 8-synyp oqýshylarynyń matematıka jáne jaratylystaný tárbıesiniń deńgeıin, sapasyn álemniń ártúrli elderinde salystyrýǵa, sondaı-aq ulttyq bilim berý júıesindegi aıyrmashylyqtardy anyqtaýǵa múmkindik beredi.
2007 jyldan bastap qazaqstandyq oqýshylar reıtıngke qatysady. Qazaqstan 179 mektepten (4710 tórtinshi synyp oqýshylary jáne 4869 segizinshi synyp oqýshylaryn) jalpy sany 9 579 oqýshyny qatystyrdy. Matematıka boıynsha 4-synyp oqýshylarynyń ortasha baly 544 upaı, jaratylystanýdan 550 ball jınasa, 8-synyp oqýshylary matematıkadan - 528 ball, jaratylystaný ǵylymdarynan - 533 upaımen kózge kóringen.
Kelesi zerteý 2019 jyly júrgiziledi.
