Qyzylordalyq oqýshylar egin alqabyn únemdi sýarý ádisin oılap tapty
Qyzylorda qalasyndaǵy Nazarbaev Zııatkerlik mektebiniń 10-synyp oqýshylary Sánııa Muratova men Jansaıa Ótepbergenova egin alqaptaryna ketetin sýdy únemdeýdiń tyń ádisterin oılap tapty. Osy maqsatta arnaıy qurylǵy jasaldy.
Ónertapqyshtar qazir egis alqaptarynda tamshylatyp sýarý tehnologııasy adamnyń qatysýymen júzege asatynyn aıtady. Osyǵan baılanysty olar tamshylatyp sýarý tehnologııasyn tolyqtaı avtomattandyrýǵa bolatynyna nazar aýdardy. Ázirge atalǵan joba shaǵyn maket retindegi qurylǵyǵa aınaldyrylǵan. Sol arqyly tájirıbeden ótkizilýde.
«Bul jobada 3 túrli datchık qarastyryldy. Nátıjesinde ylǵaldylyqty anyqtaý, kún sáýlesiniń túsýin qadaǵalaý jáne aýa temperatýrasyn esepteýge nazar aýdarylady. Olardyń jumys jasaýy eskerile otyryp, arnaıy qurylǵy ornatyldy. Atalǵan joba syrtqy faktorlardy eskere otyryp jasalǵan. Ósimdikke qolaıly jaǵdaı týyndaǵan kezde ǵana konveıer iske qosylady», - dedi Sánııa Muratova.
Joba negizinde egis alqaptaryna ketetin sýdyń kólemin 30 protsentke deıin únemdeýge bolady. Aldaǵy ýaqytta qurylǵy úlken kólemde qurastyrylyp, ol mektep aýlasynda tájirıbeden ótkiziledi.
Eske salsaq, budan buryn Qyzylordada oqýshylar egin ónimdiligin baqylaý tehnologııasyn oılap tapqan bolatyn.
