Qyzylordalyq oqýshy jańa matematıkalyq keste oılap tapty

QYZYLORDA. QazAqparat - Qyzylordalyq oqýshy Roza Sadyq matematıkany oqytýdyń ádistemesin jetildiretin jańa matematıkalyq keste oılap tapty, dep habarlaıdy QazAqparat tilshisi.

Zertteý jumysynyń nátıjesinde Ulttyq zııatkerlik menshik ınstıtýty talabyna saı jas avtor Roza Sadyq pen jetekshisi Ǵabıden Tólebaıulyna kýálik berildi. Atalmysh keste «Roza - ólshem birlikter kestesi» dep resmı ataldy.

Jas ónertapqysh Qyzylorda qalasyndaǵy №5 mektep-lıtseıinde bilim alady. Bul jańalyq «Zerde» respýblıkalyq ǵylymı-zertteý jobalary konkýrsynyń respýblıkalyq kezeńinde úzdik dep tanyldy. Atalmysh baıqaýda oǵan gran-prı berildi.

«Jobanyń basty jańalyǵy - matematıkalyq ólshem birliktermen jumys jasaýdyń ádistemelik kestesin esepter shyǵarý barysynda qoldaný bolyp tabylady. Matematıkany oqytýdyń ádistemesin jetildiretin bul jańa keste búginde bilim berý uıymdarynda sabaq protsesinde qoldanylyp keledi», - dedi jetekshisi Ǵabıden Tólebaıuly.

Aıta ketsek, bilim básekesinde qyzylordalyq oqýshynyń eńbegi 600-ge jýyq qatysýshynyń arasynan ozyq shyqty.