Qyzylordalyq oqýshy shahmattan álem chempıony atandy
QYZYLORDA. QazAqparat - Qyzylordalyq shahmatshy óren Nazerke Nurǵalı Albanııanyń Dýrres qalasynda ótken shahmattan 15 jasqa deıingi oqýshylar arasyndaǵy álem chempıonatynda jeńimpaz atandy, dep habarlaıdy QazAqparat tilshisi.
Nazerke shveıtsar júıesi boıynsha klassıka túrinen 9 týrdan 8 upaı jınap, jeńimpaz tuǵyrynan kórindi. Ol - elimizde shahmattyń damýyna eleýli úles qosyp júrgen úzdikterdiń biri. 2004 jyly 7 sáýirde Qyzylorda qalasynda dúnıege kelgen ol qazir №136 T.Júrgenov atyndaǵy mektep-lıtseıdiń 9-synybynda oqıdy. Shahmatpen 6 jasynan bastap shuǵyldanǵan Nazerke №1 oblystyq olımpıadalyq rezervtiń mamandandyrylǵan balalar-jasóspirimder mektebinde tálim alady.
Syr sańlaǵy shahmattan elimizdiń 9 dúrkin chempıony atanǵan. FIDE sheberi, Ol 2014-2015, 2017-2018 jyldary Azııa chempıonatynda kúmis jáne qola júldeger atanǵan. 2016 jyly shahmattyń rapıd túrinen Azııa chempıony bolsa, klassıka túrinen kúmis júldege qol sozdy, Nazerke byltyr Rýmynııada ótken oqýshylar arasynda álem chempıonatynda kúmis alsa, bıyl ony altynǵa jetkizdi.
«Shákirtimdi aldaǵy ýaqytta da mańyzdy jarystar kútip tur. Atap aıtqanda, ol tamyzda Mońǵolııada Azııa chempıonatyna, qyrkúıekte Túrkııada álem chempıonatyna qatysady. Bul joly Nazerke 20 jasqa deıingi qyzdar arasynda synǵa túsedi», - deıdi onyń bapkeri Vasılıı Shmelkov.
Aıta keteıik, álem chempıonatynda dúnıe júziniń 40-tan astam elinen kelgen 420 jetkinshe baq synady. Bul saıysta Qazaqstan quramasy 4 altyn, 1 kúmis, 2 qola medal ıelendi.
Avtory: Ádiljan Úmbet
