Qyzylordalyq meıramhanalar naýryz kóje ázirleýden saıysqa túsedi
QYZYLORDA. QazAqparat - Ulystyń uly kúninde Qyzylorda meıramhanalary naýryz kóje ázirleýden baq synasady. 22 naýryzda ortalyq alańda ótetin baıqaý kezinde halyq tegin dám tatatyn bolady. Bul týraly qalalyq ákimdiktiń baspasóz qyzmetinen habarlady.
Bul kúni sondaı-aq, qala ákiminiń júldesi úshin fýtboldan kóktemgi demalys týrnıri, qazaqtyń ulttyq salt-dástúrlerin nasıhattaýǵa arnalǵan óner festıvali, aýla klýbtary arasynda fýtbol jarysy ótedi.
Halyqaralyq áıelder merekesi de erekshe formatta ótedi. Barlyq salada eńbek etetin qyz-kelinshekter 6 naýryz kúni saǵat 11-de A.Toqmaǵambetov atyndaǵy mádenıet úıinde bas qosyp, fılarmonııa ónerpazdarynyń kontsertin tamashalaıdy. Erteńine M.Eralıeva atyndaǵy mádenıet úıinde kommýnaldyq saladaǵy názikjandy qyzmetkerlerdiń qurmetine qazaq estradasynyń juldyzdy juby Jazıra men Janbolat ánnen shashý shashpaq. Bazarda saýda jasap turǵan apalar da nazardan tys qalmaıdy. Olarǵa qala ákiminiń quttyqtaý haty tabystalady. Shahar basshysy Nurlybek Nálibaev búkil belsendi qyzylordalyq kelinshekterdi tól merekelerimen saltanatty túrde 7 naýryz kúni A.Toqmaǵambetov atyndaǵy mádenıet úıinde bolatyn shara barysynda quttyqtap, kópbalaly analardy «Altyn alqa» belgisimen marapattaıdy. «Qalada ǵasyrmen qurdas alty ana bar. Mereke qarsańynda olarǵa syı-sııapat kórsetilip, sýretteri Jibek joly kóshesiniń boıyna ilinedi», - delingen habarlamada.
