Qyzylordalyq merdiger 2017 jyly salynǵan balabaqshany qaıta jóndeıdi
QYZYLORDA. QazAqparat - Qarmaqshy aýdanyndaǵy «Aıgólek» balabaqshasy óz jumysyn ýaqytsha toqtatýǵa májbúr boldy. Oǵan sebep - nysannyń ishki qabyrǵalarynda jaryq paıda bolyp, irge tastarynyń otyrýy baıqalǵan, dep habarlaıdy QazAqparat tilshisi.
Atap óteıik, Qarmaqshy aýdanyndaǵy «Aıgólek» balabaqshasy 2017 jyly salynyp, paıdalanýǵa berildi. Qurylysy 2016 jyly bastalǵan edi. Qarmaqshy aýdany ákiminiń qurylys jáne turǵyn úı-kommýnaldyq sharýashylyq máseleleri jónindegi orynbasary Jalǵas Súıeýbaevtyń aıtýynsha, búginde balabaqsha ǵımaratynda jóndeý jumystary bastalyp ketti. Ol 20 shildege deıin aıaqtalady.
Tehnıkalyq zertteý jumystary jer asty sýynyń kóterilýi saldarynan edenderdiń jáne ishki qabyrǵalardyń irge tastarynyń otyrýyna alyp kelgenin anyqtady. Sonyń saldarynan qabyrǵalarda jaryqtar paıda bolǵan.
«Oryn alǵan aqaýlarǵa baılanysty Qyzylorda oblysynyń qurylys, sáýlet jáne qalaqurylysy basqarmasyna jáne Qyzylorda oblysynyń memlekettik sáýlet-qurylys baqylaý basqarmasyna 2018 jyldyń 25 mamyrynda tıisti hattar joldandy. Ǵımarattyń tehnıkalyq jaǵdaıyna basqarma tarapynan «KZ Qurylys saraptama» jaýapkershiligi shekteýli seriktestigimen tehnıkalyq zertteý júrgizildi», - dep málimdedi Jalǵas Súıeýbaev.
Saraptama qorytyndysy Qyzylorda oblysynyń qurylys, sáýlet jáne qalaqurylysy basqarmasynan Qarmaqshy aýdany ákiminiń apparatyna 2018 jyldyń 18 maýsymynda hat joldandy jáne atalǵan balabaqsha ǵımaratynda oryn alǵan aqaýlardy qalpyna keltirý úshin tıisti merdiger mekemege ruqsat berý suralǵan. Búgingi kúnge tıisti jóndeý bastaldy.
«Jobanyń jalpy smetalyq quny - 250 mln. teńge. Qurylys montaj jumystaryna oblystyq bıýdjetten qarjy bólinip, Qyzylorda oblysynyń qurylys, sáýlet jáne qalaqurylysy basqarmasy arqyly memlekettik satyp alý ótkizilgen. Nátıjesinde «Aqmeshit-Melıorator» JShS arqyly 228,7 mln. teńgege kelisim-shart jasalǵan», - dedi oblystyq qurylys, sáýlet jáne qala qurylysy basqarma basshysynyń orynbasary Almat Іzbasar.
