Qyzylordalyq mektep túlekteriniń 97 paıyzy joǵary jáne orta arnaýly oqý oryndaryna túsken
ASTANA. QazAqparat - Qyzylordalyq mektep túlekteriniń 97 paıyzy joǵary jáne orta arnaýly oqý oryndaryna bilim alýda, dep habarlaıdy QazAqparat tilshisi.
Bul týraly Qyzylorda oblysynyń ákimi Qyrymbek Kósherbaev Qazaqstan Respýblıkasy Úkimetiniń baspasóz ortalyǵynda ótken baspasóz máslıhatynda málimdedi.
"Bıyl mektep bitirgen 6000 túlektiń 97 paıyzy joǵary jáne arnaıy orta oqý oryndaryna tústi. Men osy kórsetkishpen erekshe maqtanamyn. Eger oblys damýynyń qaı kórsetkishimen maqtanasyz dep surasańyz, osyny aıtar edim. Bul oblys jastarynyń úlken áleýeti bar eken kórsetedi", - dedi Q.Kósherbaev.
Oblys ákiminiń aıtýynsha, 97 paıyz - bilim sapasynyń kórsetkishi ǵana emes, bul balalardyń beıtarap margınal jastar qataryn tolyqtyrmaıdy degen sóz. ıAǵnı, bolashaq ekstremıster men qylmyskerlerdiń ornyn toltyratyn áleýmettik baza qysqardy.
Osy maqsatta 2013 jyldan bastap óńirdegi az qamtamasyz etilgen jáne kópbalaly otbasynan shyqqan, ásirese, aýyldyq jerlerdiń balalaryna joǵarǵy oqý oryndarynda oqý úshin oblys ákiminiń granty taǵaıyndaldy. Búginge deıin 694 bala respýblıkanyń beldi oqý oryndarynda oblys ákiminiń granty esebinen bilim alýda.
Sondaı-aq, 2014 jyldan beri Qyzylorda jastary úshin Reseı Úkimetiniń arnaıy bilim granttary bólinip keledi.
«Reseıdiń jetekshi joǵary oqý oryndary Reseı Úkimetiniń granty esebinen qyzylordalyq túlekterdi tehnıkalyq mamandyqtar boıynsha oqytý, ásirese IT-mamandar, metallýrgter, tehnologtar, hımıkter ázirleý týraly usynysymyzdy qabyldady. Jylyna 150 balany ózderi tańdap alady. Búginde Reseıdiń jetekshi tehnıkalyq joǵary oqý oryndarynda bizdiń 452 túlegimiz grant negizinde bilim alýda. Kelesi jyly olardyń alǵashqy legi elge oralady», - dedi Qyrymbek Kósherbaev.
Odan bólek, M.V.Lomonosov atyndaǵy Máskeý memlekettik ýnıversıtetiniń rektory Vıktor Sadovnıchıı 2018 jyldan bastap Qyzylorda jastary úshin Máskeý memlekettik ýnıversıteti esebinen fızıka-matematıkalyq jáne mehanıka-matematıkalyq mamandyqtarǵa qosymsha 20 grant bólý týraly sheshim qabyldaǵan.
«Dál osy balalar óńirge jańa ındýstrıaldyq kelbet berip, zamanaýı zııaly qaýymdy qalyptastyratyn bolady. Biz olardyń eki memlekettiń arasyndaǵy dostyqtyń dánekeri bolatynyna senimdimiz», - dedi Qyzylorda ákimi.
Sonymen qatar, Qyzylorda oblysynyń jastary «Serpin» baǵdarlamasy boıynsha grant alý konkýrstarynda úzdik nátıje kórsetýde. Bul baǵdarlama aıasynda 4 jarym myńnan astam qyzylordalyq bilim alýda. ıAǵnı, "Serpin" stýdentteriniń basym bóligin qyzylordalyqtar quraıdy.
