Qyzylordalyq Maǵjan Shamshadın álem chempıony atandy (FOTO)
QYZYLORDA. QazAqparat - Birikken Arab Ámirliginiń astanasy Ábý-Dabıde ótip jatqan dzıýdodan jastar arasyndaǵy Álem chempıonatynda jerlesimiz Maǵjan Shamshadın eliniń kók týyn kókte jelbiretip, ánuranyn shyrqatty, dep habarlady oblystyq dene shynyqtyrý jáne sport basqarmasynyń baspasóz qyzmetinen.
55 keli salmaq dárejesinde ózbekstandyq Doston Rýzıevti, armenııalyq Vagan Hovsepıandy, ázerbaıjandyq Natıg Gýrbanlıdi, jartylaı fınaldyq kezdesýde grýzııalyq Iraklıı Kýpanadzeni utty. Al fınalda Ońtústik Koreıa eliniń sportshysy Ha Rım Lımen kezdesip, taza jeńiske jetti. Maǵjan osy jarystan QR halyqaralyq dárejedegi sport sheberi normatıvin oryndady. Baıraqty básekege 85 elden 560 sportshy qatysýda.
Aıta keteıik, Maǵjan Shamshadın Qazaqstannan shyqqan jastar arasyndaǵy ekinshi Álem chempıony. Oǵan deıin Eldos Smetov 2010 jyly dál osy salmaqta (55 keli) jeńiske jetken edi.
M.Shamshadın 1997 jyly 25 aqpanda Qyzylorda qalasynda dúnıege kelgen. J.Bahadúr atyndaǵy oblystyq sportta daryndy balalarǵa arnalǵan mektep-ınternatty bitirdi. Qazirgi tańda M.Mámetova atyndaǵy Qyzylorda gýmanıtarlyq kolledjde 2 kýrsta oqıdy.
Ol buǵan deıin 2014 jyly jasóspirimder arasynda Qazaqstan chempıonatynyń kúmis júldesin ıelense, sol jyly Qytaıdyń Gonkong qalasynda ótken Azııa chempıonatynda qola júldege qol jetkizdi. Bıyl Atyraýda jastar arasynda ótken Qazaqstan chempıonatynda birinshi oryndy ıelendi.
Oblystyq joǵary sport sheberligi mektebinde tálim alatyn Maǵjannyń bapkeri - dzıýdodan QR eńbek sińirgen jattyqtyrýshysy Qalen Qalıuly.
