Qyzylordalyq «magnıt adamnyń» denesi 100 kelilik temirdi kóteredi
QYZYLORDA. QazAqparat - Qyzylorda qalasynda magnıt adam turady. 59 jastaǵy Nartaı Tursanovtyń keýdesine temir bitkenniń barlyǵy jabysady. Syrdyń tolaǵaı turǵynynyń jeke rekordy qazir 110 keli, dep habarlaıdy QazAqparat Habar 24 telearnasyna silteme jasap.
Nartaı Tursanovtyń aıtýynsha, bul salmaqty baǵyndyrý tula boıyndaǵy kúshtiń shegi emes kórinedi. Nartaı Tursanovtyń óz salmaǵy 95 keli, al keýdesimen kóteretin júgi odan aýyr. Zil batpan temirdi qolmen ustamaı tóske jabystyrý qasıeti onyń boıynan 20 jyl buryn baıqalǵan eken. Alǵashynda 40 keli shamasynda salmaq baǵyndyrǵan Nartaı Tursanov qabiletin birte-birte jetildirip, qazir 110 kelige miz baqpaıdy.
«Tsırkshi, sportshy emespin. Magnıt adam ǵalamtordan kórseńizder buny ǵalymdar eshqandaı dáleldeı almaıdy. Bul ǵylymda tirkelmegen áli, zerttelip jatyr. Buny olar da aıtady qudaıdyń bergen qasıeti deıdi de qoıady. Biraq olar tolyq moıyndaıdy neǵurlym bıotogy kúshti adamdardyń soǵurlym emshi ekenin moıyndaıdy», - deıdi magnıt adam Nartaı Tursanov.
Balta, balǵa bitkenniń barlyǵyn ózine tartatyn apaıtósti kórýge umtylǵan syrboıylyqtar qatary kún sanap kóbeıip jatyr. Arnaıy jattyǵýsyz zil batpan júkti tóske uratyn magnıt adamnyń erekshe qasıeti talaıdy tańqaldyrǵan.
«Ol jalǵyz temirdi ǵana tartpaıdy. Oǵan qosa áınek-shynylar da tartyla beredi. Plastmassa da tartylady. Qazaq balasynyń osyndaı qabileti bar ekenin búkil álem kórse eken, álem tanysa eken dep jatyrmyz», - deıdi qala turǵyny Kenjebaı Toǵyzbaev.
«Bıomagnetıkalyq kúsh kúndelikti turmysta esh qıyndyq týǵyzbaıdy» deıdi Nartaı Tursanov. Endi ol jeke kórsetkishti arttyrýdy kózdep otyr.
