Qyzylordalyq qutqarýshylar 7 adamnyń ómirin aman alyp qaldy
QYZYLORDA. QazAqparat - Qyzylordada barjamen Qambash kóline tynyǵýǵa shyqqan turǵyndar jaǵaǵa jete almaı qaldy. Jeldiń kúshi sýǵa arnalǵan arnaıy quraldy kóldiń qaýipti aýmaǵyna qaraı alyp ketken, dep habarlaıdy QazAqparat.
Oqys jaǵdaı týraly habarlama túsken boıda qutqarýshylar oqıǵa ornyna jetti. Shuǵyl árekettiń nátıjesinde 7 adam qutqarylyp, jaǵaǵa qaıyqpen jetkizildi.
«Qaýipti jaǵdaı Aral aýdanyna qarasty «Aqqumshyq» jaǵajaıynda oryn aldy. Abyroı bolǵanda, japa shekkender joq. Medıtsınalyq kómek qajet bolmady. Osy rette turǵyndardy qaýipsizdik erejelerin saqtaýǵa shaqyramyz. Barja teńizdiń óte tereń tusyna ketip qalǵan. Mamandardyń jedel qımyldaýynyń arqasynda tynyǵýshylar aman qaldy», - dep málimdedi Ońtústik óńirlik aeroutqyr jedel qutqarý jasaǵynyń qutqarýshysy Talǵat Tursanov.
Aıta ketý kerek, ótken aptanyń ishinde Qyzylorda oblysynda 3 adam sýǵa ketip, ajal qushty. Zardap shegýshilerdiń barlyǵy ruqsat etilmegen aýmaqta shomylǵan.
