Qyzylordalyq qurylysshylar Arystaǵy jumystaryn taıaýda aıaqtaıdy
Búgingi kúnge Arys qalasyndaǵy Qyzylorda oblysyna bekitilgen aımaqtaǵy 145 úıdiń jóndeý jumystary aıaqtalǵan. Qazir 102 úı qalpyna keltirilip jatsa, taǵy 6 úıdiń jóndeý jumystary bastaldy.
Arys qalasynda ornalasqan turǵyn úılerdiń Qyzylorda oblysyna tıesili №6 aýmaqtaǵy 14 kóshede barlyǵy 254 jeke turǵyn úı, 5 áleýmettik jáne 10 kommertsııalyq nysan ornalasqan.
«Arys qalasyn qalpyna keltirý jumystary aımaqtar arasynda 17 sektorǵa bólingen, №6 ýchaske Qyzylorda oblysyna bekitilgen 254 jeke turǵyn úı bar. Olardyń biri tolyq qalpyna keltirýdi talap etedi. Sondaı-aq, bul aımaqta 15 nysan ornalasqan. Jóndeý jumystaryn júrgizýge oblysimizdyń 20 qurylys kompanııasy jumyldyrylǵan. Munda barlyǵy 186 adam eńbek etip jatyr. Shilde aıynyń sońyna deıin barlyq jumystardy aıaqtaýdy josparlap otyrmyz», - dedi Qyzylorda oblystyq qurylys, sáýlet jáne qala qurylysy basqarmasynyń basshysy Muhamedısa Álserikov.
Bıyl 9-18 tamyz aralyǵynda Arys qalasynan 150 bala Qyzylorda oblystyq bilim basqarmasynyń «Oblystyq olımpıadalar men qosymsha bilim berý ortalyǵynda» tegin demalady. Balalar úshin psıhologııalyq trenıngter, taýǵa ekskýrsııalar, túrli úıirmeler uıymdastyrylady.
Búgingi kúnge deıin Syr óńirindegi 2 800 astam memlekettik qyzmetshi, bıýdjetten qarjylandyrylatyn mekemeler, qoǵamdyq jáne úkimettik emes uıymdar, kásiporyndar, aktsıonerlik qoǵamdar men seriktestikter, sharýa qojalyqtary, jeke kásipkerler men metsenattar qarjylaı kómegin kórsetti.
Buǵan deıin «Araltuz» Arys turǵyndaryna qarjylaı kómek kórsetkenin habarlaǵan edik.
