Qyzylordalyq kásipkerlerge kedergi keltirgen sheneýnikter jaýapkershilikke tartyldy
Qyzylordada sybaılas jemqorlyqqa qarsy front ofıs ınvestorlar men bıznestiń quqyqtaryn qorǵaýdy qolǵa aldy.
«QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystyq departamenti óńirlik kásipkerler palatasymen birlesip «Protecting business and investments» front ofısi alańynda ınvestorlar jáne kásipkerlerdiń shaǵymdaryn qaraýdamyz. Bul bizge kásipkerlerdiń túıtkildi máselelerin jedel qarap, bıznestiń qyzmetine kez kelgen aralasýdan qorǵaýǵa múmkindik berip otyr. Front ofıs jumysy barysynda 10-nan astam ótinish tússe, onyń ishinde 5 ótinish laýazymdy tulǵalardyń zańsyz áreketine qatysty boldy. Shaǵymdardy qaraý nátıjesinde kásipkerlerdiń zańdy quqyqtary men múddelerine nuqsan keltirgeni úshin 2 laýazymdy tulǵa tártiptik jaýapkershilikke tartylǵan bolsa, 1 tulǵa qylmystyq jaýapkershilikke tartyldy» - dedi departamenttiń Sybaılas jemqorlyq profılaktıkasy basqarmasynyń basshysy Baǵdat Іzkenov.
Sonymen qatar, Qyzylorda oblysynda front ofıs 356,2 mlrd teńge bolatyn 12 ınvestıtsııalyq jobaǵa súıemeldeý júrgizedi.