Qyzylordalyq kásipkerler jyldy qorytyndylady
QYZYLORDA. QazAqparat - Búgin Qyzylorda oblysy kásipkerler palatasynyń Óńirlik keńesi jyldy qorytyndylady, dep habarlady «QazAqparat» HAA tilshisi palataǵa silteme jasap.
Keńes tóraǵasy Asqar Mahambetov pen Palata dırektory Ǵalymbek Jaqsylyqov bıznes ókilderin el Táýelsizdiginiń 25 jyldyǵymen quttyqtap, ekonomıkanyń damýyna úles qosyp júrgen kásipkerler tobyn marapattady.
Atap aıtqanda, «QR Táýelsizdiginiń 25 jyldyǵy» medalimen «Al-Asad» JShS dırektory Shankereı Tóreǵalı Qaryshuly, «Montajspetsstroı» JShS-niń bas dırektory Úderbaeva Raıa Pirmaǵanbetqyzy, «K-GroupLTD» JShS-niń basqarma tóraǵasy Boranbaev Qaırat Jomartuly, «Ozyq» JShS dırektory Sergeev Anatolıı Fedorovıch.
Sondaı-aq, «Atameken» UKP-nyń «Іsine adaldyǵy úshin» ІІІ dárejeli medalimen: «QazGerMunaı» BK» JShS bas dırektorynyń orynbasary Kárim Medet Sápıuly, «DALATEX» JShS dırektory Abızov Dilmuhamed Minýarbekuly. Al «RZA-Agro» JShS-niń dırektory Imandosov Nurlan Samuratuly, «T-T Qurylys servıs» JShS dırektory Bısembaev Temir Aldajumauly «Atameken» UKP basqarma tóraǵasynyń «Qurmet gramotasymen» marapattaldy.
Munan ózge, Óńirlik keńes múshesi retinde oblystyń isker azamattaryna kásibin júrgizýde qolaıly jaǵdaı jasaýǵa aıtarlyqtaı úles qosqan Keńes músheleri arnaıy alǵys hattarmen marapattaldy.
Palatanyń dırektsııasyna memlekettik bılik organdarymen, úkimettik emes, qoǵamdyq jáne halyqaralyq uıymdarmen ózara is-qımyl jasaýǵa, basqarý organdary qabyldaǵan baǵdarlamalyq qujattardy iske asyrýǵa járdemdesý maqsatynda 2013 jyly Óńirlik keńes quryldy. Óńirlik keńes quramyna aımaqtaǵy belsendi, qoǵamda orny bar, kásipkerlerdiń múddesin qorǵaı alatyn bıznes ókilderi engizildi.
Óńirlik keńes quramynda shaǵyn jáne orta bıznes, qurylys ındýstrııasy, agroónerkásiptik keshen, júıe quraýshy jáne qala quraýshy salalarynyń ókilderi 3 komıtet boıynsha: ekonomıkalyq, áleýmettik jáne quqyqtyq máselelerine qatysty jumys jasaıdy. Kásipkerlik nysandary boıynsha Keńes quramyna shaǵyn jáne orta kásipkerliktiń - 9, iri kásipkerliktiń - 7, bıznes qaýymdastyqtyń - 3, barlyǵy 19 kásipker endi.
Sonymen qatar, aýyldyq eldi mekenderdegi kásipkerlerdi jáne olardyń bastamalaryn qoldaý maqsatynda barlyq 7 aýdanda Aýdandyq kásipkerler keńesteri quryldy. Atalmysh keńes quramyna 10-12 kásipkerden engen.
Óńirlik keńes otyrysy aı saıyn ótip turady. Osynyń nátıjesinde keńes sheshimimen «Qyzylorda» óńirlik ınvestıtsııalyq ortalyǵy quryldy. Taǵy aıta keterligi, ındýstrıaldyq aımaqty damytý tujyrymdamasy, «2020 jylǵa deıingi oblystyń agroónerkásiptik keshenin damytýdyń Jol kartasy» bekitildi. «Servıs jáne qyzmet kórsetý salasyndaǵy kásipkerler qaýymdastyǵy» qurylyp, onyń aıasynda Qyzylorda ındýstrıaldy-tehnıkalyq kolledjin oblystyq bilim basqarmasymen birge áriptestik basqarý engizildi. «Bıznestiń jol kartasy - 2020», «Jumyspen qamtý jol kartasy - 2020», «Agrobıznes - 2020» jáne ózge de memlekettik baǵdarlamalardyń júzege asyrylý tıimdiligine turaqty túrde monıtorıng jasalady.
