Qyzylordalyq kásipkerler óz quqyqtaryn qorǵaýǵa qatysty 102 ótinish bildirdi
QYZYLORDA. QazAqparat - Jyl bastalǵaly Qyzylorda oblysynyń kásipkerler palatasyna bıznes ókilderinen óz quqyqtaryn qorǵaýǵa qatysty 102 ótinish tústi.
Onyń 31-i oń sheshimin tabýynyń nátıjesinde kásipkerler ózderiniń 76 mln teńgeden astam qarjatyn únemdeýge múmkindik aldy, dep habarlady QazAqparat HAA tilshisi.
«Jalpy kásipkerler palatasy qurylǵannan beri palataǵa 630 ótinish tústi. Onyń 400-ge jýyǵy oń sheshimin tapty. Nátıjesinde palata zańgerleri aımaq kásipkerleriniń 1 mlrd 112 mln teńge kólemindegi qarajatyn únemdeýine múmkindik týǵyzdy»,- dedi Qyzylorda oblystyq kásipkerler palatasynyń dırektory Ǵalymbek Jaqsylyqov Atameken Business Channel telearnasyna bergen suhbatynda.
Óz kezeginde Ǵalymbek Jaqsylyqov oblystyq kásipker sýbektilerdiń quqyqtary men zańdy múddelerin qamtamasyz etý jáne qorǵaýdy jedel jáne júıeli sheshýge negizdelgen palatanyń negizgi dıalog alańy - Kásipkerler quqyǵyn qorǵaý jónindegi keńes ekendigin tilge tıek etti.
Sondaı-aq, esepti kezeńde Kásipkerler quqyǵyn qorǵaý jónindegi keńestiń 7 otyrysy ótip, onda prokýratýra organy jáne Memlekettik qyzmet isteri jónindegi departament 16 máseleni qarady. Nátıjesinde onyń 12-si oń sheshimin tapty.
«Kásipkerler palatasynyń barlyq jumysy - ártúrli keńester men memlekettik qyzmetter jáne lıtsenzııalaý rásimderin alýda kásipkerlerge «Bir tereze» qaǵıdatymen qyzmet kórsetý úshin jaǵdaı jasaýǵa negizdelgen. Buǵan kásipkerlerge qyzmet kórsetý ortalyǵynda shaǵyn jáne orta bıznes qyzmetiniń barlyq máselelerinde quqyqtyq kómek kórsetetin jáne kásipkerlik qyzmetke negizsiz aralasý faktileri boıynsha kásipkerlerdi kestege sáıkes qabyldaıtyn «Prokýror kabınetiniń» ashylýy dálel», - degen Ǵalymbek Jaqsylyqov 8 aıda prokýrorlardyń qabyldaýynda 70 kásipker bolyp, quqyqtyq keńes alǵandyǵyn jetkizdi.
