Qyzylordalyq kásipkerler kalıfornııalyq qyzylqurt ósirýdi qolǵa aldy
Bul isti «Qazaly Agro KZ» jaýapkershiligi shekteýli seriktestigi bastady. Seriktestik qoldaýymen qazalylyq 4 azamat birigip, shylaýshyn qurtyn ósirip jatyr.
Bul - damyǵan elderde keń tanylǵan kásip. Degenmen elimizde ony paıda tabý maqsatynda ósiretin azamattar saýsaqpen sanarlyq.
Shylaýshyn ósirýdiń shyǵyny az, kirisi mol, qorshaǵan ortaǵa zııany joq, paıdasy bar, topyraqqa da, ósimdikke de zalaly kelmeıdi. Bul jóninde atalǵan kásippen aınalysyp júrgen Sábıt Aralbaev aıtyp berdi.
«Bizdiń ósirip jatqanymyz «kalıfornııalyq qyzyl qurt» dep atalady. Bul qurttardyń jeıtin taǵamy - organıkalyq qaldyqtar. Aǵashtan túsken japyraq, tórt túlik maldyń qıymen korektenedi. Bul qaldyqtar satylmaıdy, tegin. Kez kelgen jerden tabýymyzǵa bolady. Qyzyl qurttar osy qaldyqtardy jep, ishinen óńdep, bizge bıologııalyq tyńaıtqysh jasap beredi. Bıologııalyq tyńaıtqysh degenimiz - ósimdikterdiń ósýine óte qajet zat. Muny topyraqqa seýip, shashatyn bolsaq, egistiktiń ósýin 2-3 ese kúsheıtedi. Egin sharýashylyǵymen aınalysatyn adamdar qyzyl qurt óndirip shyǵarǵan tyńaıtqyshtardy satyp alady. Egistigi mol túsim bermeı júrgen dıqandar bıotyńaıtqyshty topyraǵyna seýip, mol ónim alyp jatady. Jer tuzdanyp, qurǵasa, osy tyńaıtqyshty sebedi. Jer tyńaıyp, topyraq qunarlanyp, ónim molaıady. 100 paıyz kómektesedi, dedi kásipker.
Organıkalyq tyńaıtqyshtyń 1 lıtri 80 teńgeden satylady.
Qurt ósirýdi qolǵa alǵan azamattar aldaǵy ýaqytta 15 gektar aýmaqtan jylyjaı salyp, jasyl jelekti jaıqalta ósirgisi keledi. Ol úshin bul araǵa aýyz sý men aıaq sý jáne jaryq ákelý qajet.
Kásipkerler aýdan ákimi Muhtar Orazbaevqa osy jaǵynan kómek berip, qoldaý kórsetýin surady. Aýdan basshysy kásipkerlerge kómek kórsetý joldaryn qarastyrýdy tıisti sala basshylaryna tapsyrdy.