Qyzylordalyq kásipker lımon ósirýdi qolǵa almaq
ASTANA. QazAqparat - Qyzylordalyq kásipker Qarmaqshy aýdanyndaǵy eń iri jylyjaıda lımon ósirmek. Negizinen 1 myń 600 sharshy metr aýmaqta 3,5 myń túp qyzanaq pen 1,5 myń túp qııar kútimge alynǵan. Aldaǵy ýaqytta munda kókónisten bólek tsıtrýs ónimderin óndirý josparda bar, dep habarlaıdy Habar24.kz.
Telearna saıtynyń habarlaýynsha, kásipker tipti ekzotıkalyq jıdektiń birneshe túri egip, synaqtan ótkizgen. Kásipker jylyjaı sharýashylyǵyn qurý úshin memleket tarapynan 10 mln teńge jeńil paıyzdy nesıe alypty. Aldaǵy ýaqytta taǵy aýmaǵy 2 myń sharshy metrdi quraıtyn jylyjaı salyp, ónimdilik kólemin arttyrady. Jalpy Qarmaqshy aýdanynda mundaı sharýashylyq endi damyp keledi. Búginde aýdan boıynsha 2 myń 650 sharshy metrdi quraıtyn 4 jylyjaı ǵana bar.
«Osyny syrttan kiretin kókónis ónimderiniń ornyn óz jerimizden shyqqan ónimdermen almastyrýǵa umtylý dep qaraǵan jón. Ári lımon egemiz degen oıymyz bar. Bir-eki túrin egip bastap kórdik, bolady eken, bizdiń jerge jersinedi eken. Onyń da shamaly mıkroklımatyn keltirý kerek»,-deıdi kásipker Erbol Eshmuratov.
