Qyzylordalyq kásipker kópbalaly anaǵa úsh bólmeli páter syılady

ASTANA. QazAqparat - «Jan jylýy» baǵdarlamasynyń Qazaq radıosynyń tikeleı áýe tolqynyna shyqqanyna úsh aı boldy. Osy ýaqyt aralyǵynda shyǵarmashylyq ujym 30-dan astam adamnyń muń-muqtajyn halyqqa jetkizdi. Olardyń árqaısysyna qolynda bar qarajatyn salyp, jyly sózimen de demeý bolatyn turaqty tyńdarmandaryn qalyptastyrdy.    

Osydan bir aı buryn «Jan jylýynyń» kezekti habaryna Qyzylorda qalasynan kóp balaly ana habarlasty. Úsh uly múgedek. Olarǵa kezekti em alý úshin memlekettik kvota bólingen. Alaıda otaǵasynyń qara jumystan tabatyn tabysy balalarynyń iship-jeminen artylmaıdy. Jeti perzentti ómirge ákelgen Nazerke Qadyrova qarjynyń tapshylyǵynan balalardy almatylyq aýrýhanaǵa jetkize almaı otyrǵanyn aıtady. Sonymen birge jol apatyna túsken aǵasy da qolarbaǵa tańylyp, barlyǵy 10 adam bir bólmeli páterde kún keship jatyr.

Osy aqparatty estigen Qyzylorda qalasyndaǵy «SMP-Qyzylorda» JShS-niń dırektory Temirhan Málikuly Álimqulov kóp balaly anany izdep tapty. Barlyq jaǵdaıyna kóz jetkizip, ózi basqaratyn qurylys kompanııasy soqqan jańa úıden úsh bólmeli páterdi syıǵa tartty. Páterdiń ózindik quny 10 400 000 teńgeni quraıdy. Bul jomarttyǵyn kásipker erlik dep eseptemeıdi.

«Qazaqtyń sanyn kóbeıtip, aýrýshań balalaryn aıyqtyrý úshin shyryldap júrgen osyndaı analarǵa járdem berý kerek. Bir tańǵalǵanym, otaǵasy jol apatyna túsip, qolynan zaqym alsa da qara jumysqa jegilip júr eken. Aýyrdym dep jatyp almaı, balalary úshin aıanbaı eńbek etip júrgen azamatqa qoldaý bildirgim keldi», - deıdi Temirhan Málikuly.

Páter kilti Nazerke Qadyrovaǵa keshe tabys etildi. Keń saraıdaı úsh bólmege kirgen balalardyń qýanyshynda shek joq. Sabaq oqıtyn orynyn, jatar jerin bólisip úlgerdi. Endi olar mektepke alystan qatynamaıdy. Sebebi, mektep te, meshit te, medıtsınalyq mekemeler de jańa qonystyń janynda.