Qyzylordalyq kásipker alma baǵyn ósirýdi qolǵa aldy
QAZALY. QazAqparat - Qyzylorda oblysy Jalaǵash aýdanynyń kásipkeri Erkin Bekjanov alma baǵyn ósirýdi qolǵa aldy. Ol 5 gektar jerge 13 myń túp alma aǵashyn ekti, dep habarlaıdy QazAqparat tilshisi.
«Qurmanbaı ata» sharýa qojalyǵynyń ıesi Erkin Bekjanov óziniń týǵan aýyly Temirbek Júrgenov eldi mekeni úshin perzenttik paryzyn óteýdi maqsat tutqan. Metsenat óz qaltasynan 20 mıllıon teńge qarjy shyǵaryp, aýylynyń irgesinen jer alyp, 13 túp myń alma aǵashyn egýge kiristi.
«Qazir munda jumys qyzyp jatyr. Jeti myńdaı kóshet otyrǵyzdyq. Qalǵanyn búgin-erteń egemiz. Týǵan jerimniń jasyl-jelekke ári jemisi mol ólkege aınalǵanyn qalaımyn. Jumysqa óz aýylymnyń turǵyndaryn aldym. Endi aǵashtardy kútip-baptasaq, keıin jemisin berse, ıgiligin de osy el kóretin bolady», - deıdi E.Bekjanov.
Igi isti qolǵa alǵan kásipker Júrgenov aýylynyń qadirli qarııasy Áshen atanyń batasyn aldy.
«Keńes úkimeti kezinde osy aýylda alma baq bolǵan. Keıin qaraýsyz qalǵandyqtan izin de tappaı qaldyq. Men sol baqta baǵban bolǵan edim. Qazir qýanyshymda shek joq. Іsimizdi Erkin degen azamat jalǵastyryp jatyr. Qanshama adamǵa jumys taýyp bereıin dep otyr. Kásibine bereke bersin. Qazir alma aǵashynyń bireýin bolsyn óz qolymmen egip keteıin dep kelip otyrmyn», - dedi 94 jastaǵy aqsaqal.
