Qyzylordalyq kameralyq orkestr halyqaralyq festıvalge attandy
QYZYLORDA. QazAqparat - Qyzylorda oblystyq fılarmonııasynyń janynan qurylǵan kameralyq orkestr Vengrııada ótetin túrkitildes elderdiń kameralyq orkestrler festıvaline qatysýǵa attanyp ketti, dep habarlaıdy QazAqparat tilshisi.
Atalmysh óner ujymy oblys basshylyǵynyń qoldaýymen 2016 jyly qurylǵan. Osy ýaqyt ishinde orkestr repertýary san alýan týyndylarmen tolyqty. Olar álemge belgili shyǵarmalardy oryndaıdy. Sondaı-aq, qazaq halqynyń belgili kúıshileri Qurmanǵazy men Dáýletkereıdiń artynda qalǵan mol muralaryn ónersúıer qaýymǵa keńinen nasıhattap keledi. Qazirgi ýaqytta repertýarynda 30-dan astam shyǵarmalar bar.
Kameralyq orkestrdiń kórkemdik jetekshisi - Anar Jańbyrbaeva. Dırıjerlik qyzmetti QR Eńbek sińirgen qaıratkeri, professor, kompozıtor Ánýar Aqbarov atqarady.
«Búgingi tańda orkestr mol tájirıbe jınaqtap keledi. Bizde vıolonchel, kontrabas, fortepıano, skrıpka syndy mýzykalyq aspaptarmen óner kórsete alatyn mamandarymyz bar. Jaqynda bizge TÚRKSOI halyqaralyq uıymy kameralyq orkestri keldi. Olarmen birlesken daıyndyq sharalaryn júrgizdik», - dedi kameralyq orkestrdiń kórkemdik jetekshisi Anar Jańbyrbaeva.
Kameralyq orkestr halyqaralyq festıvalge attanar aldynda jergilikti jurtshylyqpen júzdesti. Kórermen qaýymǵa óz ónerin usyndy.
Festıval 16-27 aqpan aralyǵynda ótedi. Oǵan túrki tildes eldermen qatar Bosnııa jáne Gertsogovına, Vengrııa, Serbııadan ónerpazdar qatysady dep kútilýde.
