Qyzylordalyq ǵalymdar joǵary ónimdi qaýyn sortyn shyǵarmaq
QYZYLORDA. QazAqparat - Qyzylorda qalasyndaǵy Y.Jaqaev atyndaǵy qazaq kúrish sharýashylyǵy ǵylymı-zertteý ınstıtýtynyń ǵalymdary kezindegi «Kúlábi» qaýyny sekildi joǵary sortty qaýyn ósirip shyǵarýǵa den qoıyp otyr. Mamandardyń aıtýynsha, 1 gektardan 50-60 tonnaǵa deıin ónim alýǵa bolady, dep habarlaıdy QazAqparat tilshisi.
Instıtýttyń bas dırektory Serikbaı Ómirzaqov atalmysh mekeme mamandary tek kúrish sorttaryn ǵana emes, baqsha ónimderine de mán berip kele jatqanyn aıtady. Máselen, jergilikti ǵalymdar sońǵy úsh jyldan beri qaýynnyń 60-qa jýyq sortyn tamshylatyp sýarý ádisimen tájirıbeden ótkizýde.
«Reseı, Ózbekstan, Ýkraına jáne ırandyq sorttarmen qatar jergilikti ǵalymdar ózderi ashqan jańa sorttar da synaqtan ótip jatyr. «Basty maqsat - ónimdigili joǵary, sapaly tuqym sortyn daıyndaý», - dedi bas dırektordyń orynbasary, aýyl sharýashylyǵy ǵylymdarynyń doktory Áset Toqtamysov.
Búginde ınstıtýttyń arnaıy tájirıbe alańynda 500 gektardaı egistik alqap bar. Onda kúrishtiń 17 sorty ósirilýde. Mundaǵy maqsat - naryqta suranysqa ıe, eksportqa shyǵarylatyn ónim túrlerin óndiriske engizý. Osy baǵytta Iran, Ózbekstan, Reseı elderinen ákelingen kúrish sorttaryn jergilikti jerdiń ereksheligine saı beıimdeý.
Aıta keteıik, atalǵan ınstıtýt ǵalymdarynyń «Marjan» sorty elimizdegi kúrish egisiniń jartysynan astamyna egilip, shet elderde de keńinen tanylǵan. Syrdyń tuzdy topyraǵyna tózimdi kúrish sortyna áli de suranys bar. Sondaı-aq, sońǵy jyldary shyǵarylǵan «Aı Kerim», «Syr sulýy» kúrishi jáne «Altyn araı», «Zarına» atalatyn bıdaı sorttary ózge sorttarǵa qaraǵanda birkelki, bıik ári tyǵyz ósedi.
