Qyzylordalyq ǵalymdar polıetılen paketterdi qoldanystan shyǵarýdyń jolyn tapty
QYZYLORDA. QazAqparat - Taıaýda Qorqyt Ata atyndaǵy Qyzylorda memlekettik ýnıversıtetiniń ınjenerlik beıindegi «Fızıka-hımııalyq taldaý ádisteri» zerthanasynyń jetekshi ǵylymı qyzmetkeri, hımııa ǵylymdarynyń kandıdaty Klara Dármaǵambettiń bastamasymen polımer qabyqshalary (plenka) jasaldy, dep habarlady QazAqparat tilshisi.
Bul úderis zerthana jumysynyń bir baǵyty sanalatyn nanokompozıtter alý múmkindigi boıynsha júzege asyp otyr. Búginde nanokompozıtter óndirisi ǵylymdaǵy kommertsııalyq qyzyǵýshylyq týǵyzǵan jańa salanyń biri retinde tanylyp keledi.
- Biz tabıǵı polımer negizindegi krahmaldy jáne munaıdan alynatyn ónim - glıtserındi, Qyzylorda oblysy aımaǵynan tabylǵan mıneraldy shıkizat - glaýkonıtti paıdalaný arqyly ár túrli quramdaǵy nanokompozıtter alýdy kózdep otyrmyz. Qazirgi tańda bıologııalyq ydyraıtyn qabyqshalar nanotehnologııanyń bir salasy bolyp esepteledi. Bıopolımerler jerge túskennen keıin ydyrap, topyraqty qunarly etedi. Qazir tabıǵatqa tek paıdasyn tıgizetin zattardy óndiriske engizý maqsatynda jumystar atqarylyp jatyr, - deıdi joba jetekshisi.
Qazirgi qoldanystaǵy polıetılen paketter qoqysqa tastalǵannan keıin 10-20 jyl boıy quramyn ózgertpeıdi. Olar ydyramaıdy, buzylmaıdy. Quramyndaǵy zattardyń da paıdasy joq. Al glaýkonıttiń boıynda kalıı, natrıı, fosfor, azot sekildi jerdiń qunarlylyǵyn arttyratyn bıogendi elementter bar. Sondyqtan da, polımerli paketter topyraqqa túsken soń shirip, onyń qospalary tyńaıtqysh qyzmetin atqarady. Bul mıneraldyń bıologııalyq ereksheligi de sonda.
Qyzylordalyq ǵalymdar ydyraıtyn qabyqshalardyń quramyn odan ári zerttep, túrli dúnıeler óndirýdi kózdep otyr. Glaýkonıtti bıologııalyq belsendi qospa retinde qarastyryp, dári-dármek jasaý da josparlarynda bar.
