Qyzylordalyq eriktiler qıyn jaǵdaıda qalǵan azamattarǵa qoldaý kórsetip keledi
«Bıyl Memleket basshysy Qasym-Jomart Toqaevtyń tapsyrmasymen eriktiler jyly bolyp jarııalanǵany belgili. Osyǵan oraı Qyzylorda oblysynda jan-jaqty jumys atqarýdyń naqty jospary belgilendi. Biz «Sabaqtastyq» baǵyty boıynsha jumys atqaratyn boldyq. Alǵashqy eki aıda birshama jumysty júzege asyryp úlgerdik. Álemdi dendegen qaterli dert saldarynan keıbir jobalardy keıinge shegerýge týra keldi. Dese de karantın kezinde de izgi isterdi jalǵastyrýǵa múmkindik boldy», - dedi eriktiler shtaby «Sabaqtastyq» baǵytynyń jetekshisi Bolatbek Aıtbenbetov.
Qyzylorda oblysynda qaterli dert saldarynan jarııalanǵan tótenshe jaǵdaı kezinde bul baǵytta jumys istegen eriktiler jurtshylyqqa betperde taratyp, «Biz birgemiz» aktsııasy aıasynda turmysy tómen otbasylarǵa beriletin azyq-túlikti irikteý jáne taratý jumystaryna belsene qatysty. Osylaısha eriktiler qalalyq jumyspen qamý ortalyǵynyń qyzmetkerlerimen birlesken jumystardy atqardy.
«Osy maqsatta «Qamqorlyq» daǵdarys ortalyǵynda turyp jatqan adamdarǵa qol ushyn soza aldyq. Karantınge baılanysty olarǵa betperde taratyldy. Basty maqsatymyz - tótenshe jaǵdaı ýaqytynda óńirdegi barlyq otbasynyń turmystyq jaǵdaıyna oń yqpalymyzdy tıgizý», - dedi B. Aıtbenbetov.
«Qamqorlyq» daǵdarys ortalyǵy Qyzylorda qalasynda birneshe jyldan beri qyzmet atqaryp keledi. Turmystyq zorlyq-zombylyqqa dýshar bolǵan áıelder otbasyndaǵy qıyndyqqa shydamaı atalmysh ortalyqqa keledi. Kóp jaǵdaıda olar munda balalarymen kelýge májbúr. Bul sátte olarǵa psıhologııalyq turǵydan kómektesýimiz tıis. Bizdiń baǵyt boıynsha osy maqsatta birqatar jumystar júrgizildi. Qazir Qyzylorda oblysynda balalar úıi joq. Onyń ornyna «Atameken» otbasylyq úlgidegi balalar aýyly qyzmet kórsetedi. Bizdiń baǵytymyz boıynsha eriktiler osyndaı is-sharalar josparymen jumysyn júrgizedi. Tótenshe jaǵdaıǵa baılanysty biz josparlanǵan jobalardy keıinge qaldyryp otyrmyz. Aldaǵy kúnderde ol qaıta jalǵasady degen senimdemiz», - dedi B.Aıtpenbetov.
Osylaısha qyzylordalyq eriktiler ıilikti isterdiń uıytqysy bolyp júr. Qashanda «Jaqsy istiń saýaby mol» degen sózdi qaǵıda etken olar sol izgilik jolynda nátıjeli ister atqarýǵa nıet tanytyp otyr.