Qyzylordalyq eńbekkerleri elordada jármeńkede aýyl sharýashylyǵy ónimderin usyndy
NUR-SULTAN. QazAqparat - Qyzylorda oblysy aýyl sharýashylyǵy salasynyń eńbekkerleri elordada eki kúndik dástúrli jármeńke ótkizdi, dep habarlaıdy QazAqparat tilshisi.
Jármeńkede qyzylordalyq eńbekkerler «Han Shatyry» saýda ortalyǵynyń janynda bas qala turǵyndaryna óz tartý-taralǵysyn jasady.
Jármeńkede Syrdyń dıqandary men kásiporyndary 40 júk avtokóligimen 400 tonnaǵa jýyq ónimdi elordalyq turǵyndarǵa usyndy. Olardyń jalpy quny - 100 mln teńge.
Arqa tórindegi turǵyndar Qyzylorda oblysynyń brendine aınalǵan aq kúrish, balyǵy men as tuzy, qaýyny men qarbyzynan dám tatty. Jármeńkege 140 tonna kúrish, 20 tonna balyq jáne balyq ónimderi, 150 tonna baqsha, 40 tonna asqabaq, 40 tonna kókónis pen jemis-jıdekter, 3 tonna as tuzy, 5 tonna sút jáne kondıter ónimderi jetkizildi.
Aıta ketý kerek, jármeńkede karantın talaptary saqtalyp, taýar usynýshylar dezınfektsııalyq quraldarmen tolyq qamtylǵan.
Aıta keterligi, Qyzylorda óńirinde aýyl sharýashylyq ónimderin óndirý jáne agroónerkásiptik keshen júıesin tıimdi júrgizý máseleleri jolǵa qoıylǵan. El Táýelsizdiginiń 30 jyldyǵynyń ishinde aımaqtyń agrarlyq salasynda aıtarlyqtaı jetistikterge qol jetkizildi.
Atap aıtqanda, sońǵy 10 jylda (2020 jyldy 2010 jylmen salystyrǵanda) oblystyń jalpy óńirlik ónim qurylymdaǵy aýyl sharýashylyǵynyń úlesi 4,3%-dan 5,9%-ǵa deıin ulǵaıǵan.
Mal sharýashylyǵyn damytý boıynsha da júıeli jumystar júrgizilip, nátıjesinde iri qara mal basy 1,5 ese, jylqy 2,3 ese, túıe 2 ese ósti.
Bıylǵy jyly da oblystyń jalpy egis kólemi 3,9 myń gektarǵa ulǵaıyp, barlyǵy 188,1 myń gektar jerge aýyl sharýashylyǵy daqyldary ornalastyryldy. Onyń ishinde dándi daqyldar 96,6 myń gektar, maıly daqyldar 6,7 myń gektar, mal azyqtyq daqyldar 66,4 myń gektar, kartop, kókónis, baqsha 18,3 myń gektardy qurady. Negizgi daqyl kúrishtiń kólemi 83,6 myń gektar.
Egilgen kúrishten joǵary ónim alý maqsatynda kúrish egisine 100 paıyz joǵary reprodýktsııaly tuqymdar sebildi.
Oblysta kúrishke oraq salý 26 tamyzda bastaldy. Búgingi kúni 4 716 gektar kúrishke oraq salynyp, onyń 2 495 gektary bastyryldy. Ár gektarynan ortasha 42,3 tsentnerden ónim alynýda. Búgingi kúnge oblysta 242,7 myń tonna kartop, kókónis, baqsha jáne 20,2 myń tonna et, 49,5 myń tonna sút óndirilip otyr.
Syr eliniń aýyl sharýashylyǵy ónimderi álemniń 16 memleketine eksporttalýda. Eksporttalǵan ónimniń 95 paıyzy oblystyń negizgi daqyly kúrish ónimi Reseı, Qyrǵyzstan, Belarýs, Ázirbaıjan, Mońǵol memleketi, Tájikstan, Ýkraına, Ózbekstan jáne Irak memelketterine eksportqa shyǵýda.
Eske salsaq, Qyzylordada bes jylda Aral teńiz ultanyna 1,1 mıllıon gektar sekseýil otyrǵyzylady
