Qyzylordalyq dıqandar kúrishke oraq saldy
Qala əkimi Nurlybek Nəlibaev Qaraýyltóbe aýyldyq okrýginiń egis alqabynda bolyp, kúrishke alǵashqy oraq salý rəsimine qatysty. Atalǵan sharaǵa jınalǵandar aldymen aýyl sharýashylyq salasynyń bıylǵy kórsetkishteri men Y.Jaqaev atyndaǵy «Qazaq kúrish sharýshylyǵy» ǵylymı-zertteý ınstıtýty JShS-niń ǵylymı jetistikterimen tanysty.
Bıyl qala dıqandary 8 myń 747 gektar alqapqa aýyl sharýashylyǵy daqyldaryn ornalastyrdy. Onyń ishinde 4 myńnan astam gektarǵa kúrish egildi.
«Alǵashqy kezekte dıqandardyń eńbegin aıta ketkenimiz abzal. Sharýa adamdary eginnen mol ónim jınaý maqsatynda jazdyń aptabyna qaramastan eseli eńbek etti.
Endigi kezekte mańdaı teriniń jemisin shashpaı-tókpeı jınap alý mindeti tur. Ol úshin qajetti tehnıka saqadaı saı, jumys kúshi jetkilikti. Bıyl ər gektardan 50-55 tsentner shamasynda ónim alynady dep boljap otyrmyz», - dedi Y.Jaqaev atyndaǵy
«Qazaq kúrish sharýshylyǵy» ǵylymı-zertteý ınstıtýty JShS dırektorynyń orynbasary Rústem Ońdashov.
Ǵylymı-zertteý ınstıtýtyna qarasty təjirıbe alańyndaǵy 275 gektarǵa jergilikti «Syr sulýy» sorty egilgen bolatyn. Instıtýt dırektory Baqytjan
Dúısembekovtiń aıtýynsha, otandyq sort basqa kúrish túrine qaraǵanda sýdy az qajet etedi. Aımaqtyń tabıǵı-klımattyq, topyraq jəne melıoratıvtik jaǵdaıyna beıimdelgen. Potentsıaldy ónimdiligi men dəmdik qasıetteri joǵary. Orý, bastyrý jəne óńdeý kezindegi mehanıkalyq əserlerge tózimdi. Sonyń nətıjesinde bútin dənderdiń joǵary shyǵymdylyǵyn qamtamasyz etedi.
Bıyl aımaqtaǵy sý tapshylyǵyna baılanysty qala dıqandary egin sharýashylyǵyn ərtaraptandyrýǵa basymdyq berdi. Bul baǵytta 70 gektarǵa qant qumaıyn, 100 gektarǵa soıa, 302 gektarǵa jazdyq, 90 gektarǵa kúzdik bıdaı egildi.
«Ərtaraptandyrýǵa ýaqytyly den qoıa bildik. Nətıjesinde bıyl qalaǵa qarasty sharýashylyqtarda sý tapshylyǵy oryn alǵan joq», - deıdi qalalyq aýyl
sharýashylyq bóliminiń basshysy Dəýletbek Abdırasýlov.
Qazirgi tańda bıdaı, suly, arpa, kartop, kókónis, baqsha daqyldary tolyǵymen jınaldy. Kartoptyń ər gektaryna 127, arpadan 2,4, sulydan 4,7, jazdyq bıdaıdan 12,2, kúzdik bıdaıdan 7, kókónisten 127,6, baqshadan 131 tsentnerden ónim alynýda.
Sondaı-aq, qyzylordalyq dıqandar baý-baqsha ónimderin eksportqa shyǵarmaq.