Qyzylordalyq dıqandar baý-baqsha ónimderin eksportqa shyǵarmaq
QYZYLORDA. QazAqparat - Qyzylordada jergilikti kásipkerler gollandııalyq sorttar boıynsha baý-baqsha egip, ony eksportqa shyǵarýdy josparlap otyr, dep habarlaıdy QazAqparat tilshisi.
Qala ákimi Nurlybek Nálibaev olardyń jumysymen tanysyp, tıisti qoldaý jasalatynyn jetkizdi.
2016 jyly «Іsker-M» JShS alǵash ret qala irgesindegi Birqazan eldi mekeninde gollandııalyq baqsha ónimderi tuqymdaryn ekken. Osylaısha olardy Syr óńirine jersindirý isin qolǵa aldy. Bastapqy kezeńde 16 gektar aýmaqqa 16 túrli daqyl egildi. Olardyń arasynan ónimdiligi joǵary túrleri tańdap alyndy.
Bıyl atalǵan jumys Nıderlandynyń «Rijk Zwaan» kompanııasymen birlesken joba negizinde qolǵa alyndy. Sol arqyly dıqandar 7 túrli ónim egý isine nazar aýdardy. Mundaı daqyldar qatarynda gollandııalyq tátti júgeri, asqabaq pen qarbyz jáne qaýynnyń «Pıel de Sapo», «Galııa», «Pantalýpa», «Ammorello» túrleri bar.
«Bul ónimder uzaqqa saqtalatyndyǵy jáne erekshe dámimen erekshelenedi. Naryqta suranysy joǵary. Qazirdiń ózinde daqyldarǵa tapsyrys berýshiler daıyn. Aldaǵy ýaqytta eksportqa shyǵarýdy da josparlap otyrmyz», dedi mekeme menedjeri Arystanbek Shaımenov.
Baý-baqsha alqaby tamshylatyp sýarý júıesi arqyly jumys isteıdi. Bul aýmaq sońǵy úlgidegi zamanaýı quraldarmen jabdyqtalǵan. Ony qashyqtan basqarý arqyly da sýarýǵa bolady.
Ónim túrlerimen tanysqan qala basshysy olardyń sapasyna joǵary baǵa berdi. Baý-baqsha alqaby kólemin ulǵaıtý múmkindikterin saralady. Seriktestik músheleri qala basshysynan egis kólemin ulǵaıtý maqsatynda Birqazan eldi mekeninen qosymsha jerdi jalǵa alýdy zań aıasynda sheship berýin surady. Qala ákimi ol máseleniń eki apta ishinde sheshimin tabatyndyǵyn jetkizdi. Sondaı-aq, baǵbandarǵa beriletin jerge ınfraqurylym tartý men sýbsıdııa bólý máselesine de nazar aýdaryldy.
Aıta ketsek, buǵan deıin Qyzylordada «Taǵzym alańy» qaıta jańǵyrtylatyndyǵyn habarlaǵan bolatynbyz.
