Qyzylordalyq dáriger: Úıge barmaǵanyma 3 apta boldy
QYZYLORDA. QazAqparat – Jańaqorǵan aýdanaralyq aýrýhanasynyń ınfektsıonıst dárigeri Ásel Seıilova QazAqparat tilshisine sońǵy úsh aptada qalaı jumys istep jatqany týraly aıtyp berdi.
Ásel Seıilovanyń aıtýyna qaraǵanda ol sońǵy úsh apta úıine barmaǵan. Táýlik boıy jumys ornynda qalady.
«Meniń úıge barmaǵanyma 3 aptadaı ýaqyt boldy. Jumysta qonyp, osynda qalýdamyz. Bul barlyǵymyz úshin qaýipsiz. Men naýqasqa shaldyqqandardy emdep jáne óziniń jaqyndarymdy qaýipti dertten qorǵaǵym keledi. Qaýipti indetti joıǵansha qyzmet ornynda bolamyz», - dedi Ásel Seıilova.
Sondaı-aq, ol jalaqysy qosylǵan ústemaqy týraly da aıtty.
«Bala kúnimnen dáriger bolýdy aldyma maqsat ettim. Sol armanyma qol jetkizdim. On jyldan astam ýaqyttan beri densaýlyq saqtaý salasynda qyzmet atqaryp kelemin. Prezıdentimiz Qasym-Jomart Toqaev eńbegimizdi eskerip, aılyǵymyzǵa qosymsha tólemaqy tóleýge sheshim qabyldaǵanyn bilemiz. Maǵan naýryz aıynyń jalaqysyna ústeme tólengeni týraly uıaly telefonyma habarlama kelip tústi. Onyń kólemi 248 000 teńgeni quraıdy», - dedi ol.
Eske salsaq, Qyzylorda oblysynda koronavırýs ınfektsııasy dıagnozy qoıylǵan 127 adam bar.
