Qyzylordalyq «Dalatex» JShS 185 oqýshyǵa tegin kóılek tigip berdi
Elbasynyń maqalasynan keıin Ulttyq kásipkerler palatasynyń bastamasymen júzege asyrylyp jatqan «Atamekenim» aktsııasyna qyzylordalyq kásipkerler de ún qosýda.
Kásipkerler palatasyna aımaq turǵyndarynan qaıyrymdylyq kómek kórsetý jóninde kóptegen hattar túsedi. Palata - kásipkerlerge qarjylaı emes qoldaý kórsetetin uıym. Degenmen, mundaı ótinishterge qatysty múmkindigine qaraı kómektesýge tyrysady.
Osyndaı ótinishterdiń biri jaqynda qaladaǵy № 144 mektepten tústi. Mektep basshylyǵynyń aıtýynsha bilim berý uıymynda 200-ge jýyq áleýmettik az qamtylǵan, sondaı-aq múmkindigi shekteýli balalar oqıdy eken. Mektep basshylyǵy osy balalarǵa qandaı bolsa da kómek kórsetilýin suraǵan eken. Ótinishke qalamyzdaǵy "DALATEX" JShS-niń basshysy Dilmuhamed Abızov kómek kórsetýge ázir ekendigin bildirip, atalmysh mektep oqýshylaryna 185 qyz jáne er balalarǵa arnalǵan arnaıy jeıdeler tigip berdi.
Kompanııanyń menedjeri Gúlmıra Ramazanqyzy «Dalatex» JShS-niń qurylǵanyna 2 jyldaı ýaqyt bolsa da qaıyrymdylyq sharalaryna belsendi qatysatyndyqtaryn jetkizdi: «Kompanııa basshysy bıznestiń áleýmettik jaýapkershiligi aıasynda qaıyrymdylyq sharalaryna belsendi qatysady. Sonyń ishinde osy №144 mektepke arnalǵan sharada kómek retinde 185 balaǵa jeıdelerdi ákelip otyrmyz».
«DALATEX» JShS Syr óńirinde erler jeıdesin tigýmen aınalysatyn otandyq kompanııa. Fabrıkada barlyq tehnologııalyq protseske qajetti zamanaýı ozyq jabdyq qoıylǵan. Qazirgi tańda fabrıkada kúnine 500 kóılek tigiledi. Kompanııada 40 jumysshy eńbek etedi. Satyp alýshylarǵa yńǵaıly bolý úshin elimizdiń ózge de óńirlerinen saýda qoımalaryn ashý josparlanǵan. Búginde kásipker reseılik áriptestermen yntymaqtastyq ornatyp otyr.