Qyzylordalyq búldirshinder ózderiniń merekesinde ortalyq meshitte bolyp syılyqtar aldy
QYZYLORDA. QazAqparat - Ortalyq «Aqmeshit-Syrdarııa» meshitiniń uıymdastyrýymen balalar merekesine oraı, qaladaǵy jetim jáne ata-anasynyń qamqorlyǵynsyz qalǵan balalar úıiniń tárbıelenýshileri men ustazdary meshitte qonaq boldy.
Ortalyq «Aqmeshit-Syrdarııa» meshitiniń baspasóz qyzmeti habarlaǵandaı, balalar aldymen «Alla úıin» aralap, ishki qurylysymen tanysyp, meshittiń sáýlet ónerine tań-tamasha boldy. Jetkinshekterge ortalyq meshittiń naıb ımamy Nurlan Abjanov qaıyrymdylyq, meıirimdilik, izgilik týrasynda jaqsylyqqa úndep ýaǵyz aıtty.
Meshitti aralap bolǵan soń balalar úshin jaıylǵan aq dastarhan aıasyna jınala qaldy. Aýqattanyp bolǵan soń balalarǵa tátti balmuzdaqtar úlestirilip, Bas múftıdiń bastamasymen jaryqqa shyqqan «Din men dástúr» kitaby, Qaırat Joldybaıulynyń «Din men dil» jáne basqa da kitaptar syıǵa berildi.
Osylaısha balǵyn balaqaılar pák júrekterinen alǵystaryn aıtyp, aq tilekterin joldady.
