Qyzylordalyq boksshylar Bolgarııada sheberlikterin dáleldedi
QYZYLORDA. QazAqparat - Bolgarııanyń Sofııa qalasynda ótken «Strandja» atty halyqaralyq boks týrnırinde qyzylordalyq bylǵary qolǵap sheberleri jaqsy óner kórsetip, el abyroıyn asqaqtatty, dep habarlady QazAqparat HAA tilshisi oblystyq Dene shynyqtyrý jáne sport basqarmasyna silteme jasap.
Jarysqa Qazaqstannan 7 sportshy qatysyp, Syr eliniń boksshylary ǵana ózderiniń myqtylyǵyn dáleldedi.
Atap aıtqanda, 75 keli salmaqta synǵa túsken Tursynbaı Qulahmetov fınalda bolgar sportshysyn 5:0 esebimen jeńip, týrnırdiń jeńimpazy atandy. Al 91 keliden joǵary salmaq dárejesinde Qamshybek Qońqabaev qola júldeni enshiledi.
Qyzylorda oblysynyń joǵary sport sheberligi mektebinde tálim alatyn qos sportshyny jarysqa Ǵalym Baıǵundıev pen Jámil Júsipov daıyndady. Sportshylar aldaǵy ýaqytta Ózbekstanda ótetin Azııa chempıonatyna daıyndalýda.
