Qyzylordalyq «bıznesmender» 50 gektardan astam jerge esirtki ekken
QYZYLORDA. QazAqparat- Byltyr Qyzylorda oblysynda 50 gektardan astam jerge esirtki egilgeni anyqtaldy.
Quqyq qorǵaý organdarynyń aıtýynsha, aımaq klımaty úndi sorasyn ósirýge qolaıly, al úndi sorasynan jasalǵan gashısh pen marıhýana nashaqorlar arasynda joǵary suranysqa ıe. Bul týraly Óńirlik kommýnıkatsııalar qyzmetinde ótken baspasóz máslıhatynda málim boldy, dep habarlaıdy «QazAqparat» HAA tilshisi.
Aımaqta «Esirtkisiz bolashaq» jobasyn iske asyrý bastaldy. Jobanyń bastapqy satysynda esirtki tutynatyn adamdardy anyqtap, olarǵa medıtsınalyq-áleýmettik sıpattaǵy keshendi kómekter kórsetý arqyly nashaqorlyqtyń aldyn alý jumystary atqarylatyn bolady. Sondaı-aq halyq arasynda esirtkige qarsy ımmýnıtetti qalyptastyrýǵa baǵyttalǵan aqparattyq sharalar júrgiziledi.
«Sońǵy 5 jylda esirtkiniń zańsyz aınalymyna qatysty qylmystardyń ósý dınamıkasy saqtalýda. 2012 jylmen salystyrǵanda esirtkini egip ósirý jolymen alýdyń sany ulǵaıyp otyr. Tek 2016 jyldyń ózinde 50 gektardan astam jerge egilgen 32 oryn anyqtalyp, joıyldy», - deıdi Qyzylorda oblystyq prokýratýrasy basqarma bastyǵynyń orynbasary, ádilet keńesshisi Nurken Turǵanbaı.
Oblystyq ІІD-niń bólim basshysy Gaýhar Omarovanyń aıtýynsha, Syr óńiriniń klımaty úndi sorasyn ósirýge qolaıly eken.
«Jabaıy Shý sorasynan úndi sorasynyń adamǵa áseri 5 esege artyq. Úndi sorasynan jasalǵan gashısh pen marıhýana nashaqorlar arasynda joǵary suranysqa ıe. Budan bólek, Іshki ister mınıstriniń nusqaýyna sáıkes, Qyzylorda oblysynda «DeltaSyrdarııa» esirtki bıznesine qarsy kúres bólinisin qurý týraly sheshim qabyldandy. «Kóknar» jedel profılaktıkalyq is-sharasy barysynda bizdiń aımaqqa basqa oblystardan qosymsha qyzmetkerler bólinip, sońǵy úlgidegi tehnıkalyq quraldarmen jumys atqarylady», - deıdi G.Omarova.
