Qyzylordalyq balýan qazaq kúresinen 2 dúrkin álem chempıony atandy
QYZYLORDA. QazAqparat-Astana qalasynda aıaqtalǵan qazaq kúresinen Álem chempıonatynda qyzylordalyq Ǵalymjan Abdrahmanov altyn medal ıelendi, dep habarlady QazAqparat tilshisi oblystyq dene shynyqtyrý jáne sport basqarmasyna silteme jasap.
Jarysqa 40 memleketten 200-ge jýyq balýan 9 salmaq dárejesinde júldelerdi sarapqa saldy.
Aıtýly jarysta Qazaqstan qurama komandasy jaqsy óner kórsetip, 6 altyndy ıelendi. Jerlesimiz Ǵalymjan jarys barysynda 5 kezdesý ótkizip, aqtyq saıysta «búk» ádisimen Kýba sportshysynan aılasyn asyryp, 74 keli salmaqta chempıon atandy.
Ǵ.Abdrahmanov 1993 jyly Qarmaqshy aýdanynda dúnıege kelgen. Ol qazaq kúresimen qatar sambo jáne dzıýdo sportymen de shuǵyldanady. Jetistikterin aıtatyn bolsaq, qazaq kúresinen jáne sambodan QR halyqaralyq dárejedegi sport sheberi, dzıýdodan sport sheberi.
Qazaq kúresinen 2 márte Qazaqstan chempıony, birneshe márte halyqaralyq jarystardyń jeńimpazy, bıylǵy jyly Aqtóbedegi sambodan el chempıony, Tashkent qalasyndaǵy Azııa chempıonatynyń qola júldegeri, Ashhabad qalasyndaǵy Azııa oıyndarynyń qola júldegeri, Astanadaǵy Elbasynyń júldesi úshin ótken Álem kýbogynyń jeńimpazy atanǵan. Sondaı-aq, 2015 jylǵy Reseıdegi qazaq kúresinen Álem chempıony.
Sportshy oblystyq joǵary sport sheberligi mektebinde tálim alsa, Qarmaqshy aýdanyndaǵy sport klýbta nusqaýshy qyzmetin atqarady.
Bapkerleri Bolat Keneev jáne Ádilbek Serikbaevtyń aıtýynsha, ol qarasha aıynyń ortasynda Sochı qalasynda sambodan bolatyn Álem chempıonatyna qatysady.
