Qyzylordalyq baǵban bambýk ósiredi

Syr óńiri negizinen shóleıtti aımaq ekeni belgili. Shybyq tikseń shyǵa bermeıtini taǵy bar. Árbir tal-terekke erekshe kútim kerek. Osyndaı aımaqta bárimizge tańsyq bambýk aǵashyn kim ósirip jatyr eken dep qyzyǵýshylyq bildirdik.

Rasynda da, jergilikti baǵban Amantaı Sarbasov bul isti bıyl qolǵa alypty. Alǵashqyda ol jaıynda naqty derekter jınaqtaǵan. Jahandyq jelini sharlaı otyryp kóptegen qundy málimetterge kezikti. Ony alý joldaryn qarastyrdy. Tanystary bambýk aǵashynyń kóshetin jetkizip bergende áýeli qalaı bolar eken dep oılanyp qalǵany ras. Qashanda táýekel iske bilek sybana kirisetin daǵdysymen buǵan da nazar aýdardy.

«Alǵashqyda ósip ketýine kúmánim bolǵany ras. Onyń sebebi de joq emes. Negizinen ol tropıktik aımaqtarda ósedi. Bizdiń óńirdiń klımaty, aýa raıy, topyraǵy oǵan saı kele me? Kúmánim beker bolyp shyqty. Bambýk kúnnen kúnge boıyn tiktep, jasyl jelegin jaıqalta tústi. Qazir boıynyń uzyndyǵy 3 metrge jetti. Sýda kóbirek turýy kerek. Ol jaǵy qamysqa uqsas. Uzaq jyldan beri baǵbandyqpen aınalysqandyqtan san alýan ósimdikterge tájirıbe jasaǵandy janym qalaıdy», - deıdi ol.

Bambýk - astyq tuqymdasyna jatatyn aǵash sabaqty ósimdik. Bambýktyń 47 týysy, 200-den astam túri bar. Ol Avstralııa, Azııa jáne Amerıka qurlyqtarynda keńinen taralǵan.

«Oǵan erekshe kútim jasaǵan joqpyn. Ózi birden-aq boıyn tiktep ketti. Ras, bizdiń jerimizdiń aýa raıy qatal, topyraǵynyń da qunary tómen. Keıbir daqyldar men ósimdikterge arnaıy jaǵdaı jasalýy tıis. «Babyn tapsań jer jomart» deıdi ǵoı halqymyz. Meniń baqshalyǵymda grek jańǵaǵy da ósip tur. Oǵan qosa mındal, fýndýk jańǵaǵy da bar. Almanyń 10 sortyn ósiremin. Óriktiń 4-5 sorty bar, júzimniń de birneshe sorty baqsha sánin keltirip tur. Al gúldiń 12 túri jaıqala óskende ózińe erekshe sezim syılaıdy. Tańerteń baqshama bas suqqanda sondaı kúıge bólenemin», - deıdi baǵban.