Qyzylordalyq azamat bir búıregin áıeline berdi
QYZYLORDA. QazAqparat - Qyzylorda qalasynyń turǵyny Nurbek Nuraddın óziniń áıeline donor boldy, dep habarlaıdy QazAqparat tilshisi.
Bul azamattyń súıikti jary eki jyldan astam ýaqyt beri búırek aýrýynyń zardabyn tartyp kelgen. Elimizdiń kóptegen dárigerlerine qaralyp, dertine shıpa izdegenimen em qonbaǵan. Nátıjesinde dárigerler búırek aýystyrý qajet ekenin aıtyp, donor izdegen.
«Meniń áıelimniń eki búıregi de jumys jasamaı qaldy. Tek dári-dármektiń kúshimen júrdi. Mamandar meniń aǵzamdy zerttedi. Búıregim aýystyrýǵa jaraıtynyn bilgenimde qatty qýandym. Qazir densaýlyǵym jaqsy. Eshqandaı aýyrlyq sezingen joqpyn. Allaǵa shúkir, ota sátti ótti. Eń bastysy, ómirlik jarymnyń jaǵdaıy túzelip keledi», - deıdi Nurbek Nuraddın.
Qazir qyzylordalyq azamattyń áıeli Almaty qalasyndaǵy kardıologııa jáne ǵylymı zertteý ınstıtýtynda emin jalǵastyryp jatyr, dárigerlerdiń baqylaýynda. Dámettiń Nuraddınge degen rızashylyǵy zor.
«Biz Nuraddın ekeýmizdiń otasqanymyzǵa 25 jyl boldy, 3 bala tárbıelep otyrmyz. Maǵan donor bolýǵa keliskeni úshin alǵysym sheksiz. Barlyq jaǵynan onyń aǵzasy maǵan sáıkes keldi», - deıdi qyzylordalyq kelinshek.
Búginde Nurbek Nuraddın aýrýhanadan shyǵarylǵan. Jaqyn kúnderde áıeli de Qyzylordaǵa qaıtýdy josparlap otyr.
«Ota shamamen bes saǵatqa sozyldy. Eki kisiniń qan toby men DNK-sy bir birine tolyqtaı sáıkes keldi. Sonyń arqasynda búırekti aýystyrý múmkin boldy. Ádette, naýqastyń týystary donor bolyp jatady. Bul úlken sáttilik boldy», - deıdi Almaty qalalyq kardıologııa jáne ǵylymı zertteý ınstıtýtynyń transplantologııa bóliminiń meńgerýshisi Ákimjan Zaınalov.
