Qyzylordalyq áıel kámelettik jasqa tolmaǵan qyzynyń nárestesin satpaq bolǵan

QYZYLORDA. QazAqparat - Qyzylorda qalasynda áıel kámelettik jasqa tolmaǵan qyzynyń nárestesin satýǵa áreket jasaǵan. Oǵan qatysty qylmystyq is qozǵaldy, dep habarlaıdy QazAqparat tilshisi.

Bul jóninde áleýmettik jelide jarııalandy. Onda anasy kámelettik jasqa tolmaǵan qyzynyń ómirge alyp kelgen nárestesin satýǵa árekettengeni aıtylǵan. Jasóspirim qyz kafelerdiń birinde daıashy bolyp eńbek etken.

Qyzylorda oblystyq polıtsııa departamenti atalǵan oqıǵanyń bolǵanyn rastady. Ol jóninde tómendegishe túsinikteme berdi.

«Osy jyldyń 7 qyrkúıeginde tirkelgen derek boıynsha QR Qylmystyq kodeksiniń 135-babynyń 1-bóligimen (kámeletke tolmaǵandar saýdasy deregi boıynsha) qylmystyq is tirkelip, tergep-tekserý júrgizilýde. Qylmystyq-protsestik kodeksiniń 201-babynyń talaptaryna sáıkes, tergeý derekterin jarııa etýge jol berilmeıdi», - dep jazylǵan departament habarlamasynda.

Oqıǵaǵa baılanysty oblystyq bilim basqarmasy túsinikteme berip, baqylaýǵa alynǵanyn jetkizdi.

«Oqıǵa tirkelgen ýaqyttan bastap bilim bóliminiń qamqorshylyq qorǵanshylyq fýnktsııasyn júzege asyratyn organ mamandary baqylaýǵa aldy. Oǵan qatysty tıisti sharalar atqaryldy. Búgingi tańda sábı kámeletke tolmaǵan anasynyń qolynda ekendigin jetkizemiz», - dedi oblystyq bilim basqarmasynan.

Eske salsaq, budan buryn Qyzylordada saıajaıdaǵy turǵyn úıden er adamnyń máıiti tabyldy.