Qyzylordalyq ártister Batyrhan Shúkenovtiń ánin ulttyq aspaptarmen oryndady

  ASTANA. QazAqparat - «EKSPO-2017» halyqaralyq kórmesi aıasynda ótkizilgen Qyzylorda oblysynyń mádenı kúnderi asa kórnekti «Syrdarııa - Jyrdarııa» kontsertimen aıaqtaldy, dep habarlaıdy «QazAqparat» HAA tilshisi.

Amfıteatrda kontsert astanalyqtar men qazaqstandyqtardyń ǵana emes, shetelden kelgen meımandardyń da zor yqylasyna ıe boldy. Al júrgizýshiler kontsertti qazaq jáne orys tilimen qatar, aǵylshyn tilinde de ótkizdi.

Qyzylordalyq ónerpazdar jan-jaqty kontserttik baǵdarlama ázirlep kelgen. Shara barysynda qazaqtyń dástúrli ánderi shyrqalyp, opera aıtyldy. Ulttyq bımen qatar bıshiler baletti de bıledi. «Tomırıs» ansambli «Saq arýlary» atty spektakldi-bı ónerin pash etti.

Kórermenderdiń ásirese vokaldy-aspapty «Syr samaly» ansambliniń óneri este qalary sózsiz. Talantty ártister Batyrhan Shúkenovtiń tanymal «Otan ana» ánin, «Pırat teńiziniń qaraqshylary» fılminiń saýndregi men «Bıtlz» tobynyń «Yesterday» ánin ulttyq dástúrli aspaptarmen oryndap berdi. Kóńildi keshti qazaqstandyq estradanyń Almas Kishkenbaev, Serik Ibragımov pen Madına Sádýaqasova syndy juldyzdary sátti aıaqtady.

Eske sala ketsek, «EKSPO-2017» mamandandyrylǵan halyqaralyq kórmesi aıasynda 10-14 tamyz aralyǵynda Astanada Qyzylorda oblysynyń Mádenı kúnderi bolyp ótti. Shara aıasynda tarıhı-aımaqtyq kórme men ultyq sport túrlerinen saıystar, spektaklder men kontsertter uıymdastyryldy. Sondaı-aq, elordada qyzylordalyqtardyń jármeńkesi bolyp ótti. M.Gorkıı atyndaǵy orys drama teatrynda Iran Ǵaıyptyń «Qorqyt» spektakli qoıylyp, «Qazanat» atshabarynda aýdaryspaq, teńge ilý, qyz qýý, jamby atý, qazaq kúresi, toǵyz qumalaq, asyq atý syndy ulttyq sport túrlerinen saıystar uıymdastyryldy.