Qyzylordalyq 800 túlek júzden joǵary ball jınady
QYZYLORDA. QazAqparat - Qyzylorda oblysynda ulttyq biryńǵaı testileý nátıjesi boıynsha 800 túlek júzden joǵary ball jınap, óńirdegi ortasha kórsetkish 82,4 baldy qurady, dep habarlady QazAqparat.
Bul týraly Óńirlik kommýnıkatsııalar qyzmetinde ótken baspasóz máslıhatynda oblystyq bilim basqarmasynyń basshysy Baqytjan Saılybaev aıtty.
«Bıylǵy jyly jalpy orta bilim beretin mektepti bitirgen 6196 balanyń ishinde 4123 ulttyq biryńǵaı testileý synaǵyna qatysty. Testileý qorytyndysy boıynsha eki túlegimiz eń joǵary nátıjege qol jetkizdi. Olar oblystyq «Bilim ınnovatsııa» lıtseıinen - Ábdirásil Aızat jáne Qarmaqshy aýdany №250 orta mektebinen - Otarbaı Dáýren. Olar testileý nátıjesinde 136 ball jınady. Atalǵan túlekterdiń ekeýi de «Altyn belgi» ıegeri bolyp tabylady. Jalpy aımaqta úsh kún boıy ótkizilgen testileýdiń qorytyndysy boıynsha ortasha kórsetkish 82,4 baldy qurady. Synaq barysynda testileý pýnkterinde oqys oqıǵa men ereje talaptarynyń buzylý derekteri oryn alǵan joq» - dedi basqarma basshysy.
Aıta keterligi, ótken jyly qyzylordalyq túlekter UBT qorytyndysymen respýblıkada alǵashqy bestiktiń qatarynan kórindi. Bul - oqýshylardy aımaqtaǵy jyl boıy jumys jasaıtyn tynyǵý lagerlerinde qosymsha oqytýdyń nátıjesi.
