Qyzylordalyq 8-synyp oqýshysy úıdi jylytý tásilin oılap tapty
QYZYLORDA. QazAqparat - Qyzylordalyq 8-synyp oqýshysy Maqsat Qarlyhan mal qıynan bıogaz ala otyryp, úıdi jylytý tásilin oılap tapty, dep habarlady NZM baspasóz qyzmetinen.
Qyzylorda kalasyndaǵy hımııa-bıologııalyq baǵyttaǵy Nazarbaev Zııatkerlik mektebiniń oqýshysy álemdegi tabıǵat resýrstarynyń tez taýsylyp jatqanyna alańdaýly. Osy oraıda, ol aınalaǵa zalalyn tıgizbeı turǵyn úı jáne mal qoralardy jylytýǵa bolatyn bıogaz alýdy oılap tapty. «Álem ǵalymdary jel, kún kózinen qýat kózin alýdy oılap júr. Al biz kádimgi mal qıynan alynǵan bıogazdy usynamyz. Ony turǵyn úılerdi jylytýǵa otyn retinde paıdalanýǵa bolady», - deıdi Maqsat Qarlyhan. Qurylǵy bıogaz túzý úshin qoldanatyn bıomassa men bakterııa arasynda júretin reaktsııa rezervýary, gaz qospasynan tazartatyn súzgish rezervýary jáne gazdy saqtaıtyn rezervýardan turady. «Birinshi rezervýarda aralasqan gaz qospasy basqa gaz qospalarynan tazalaný úshin ekinshi rezervýarǵa túsedi. Nátıjesinde metan bólinip shyǵyp, úshinshi rezervýarǵa bólinedi. Jumysymyzdyń kelesi kezeńi - bıogazdyń shyǵýyn ulǵaıtý úshin anaerobty bakterııalardy ósirý. Qıyndyǵy - jasaǵan ortada kıslorodtyń jetispeýi bolyp otyr. Ol úshin Petrı ydysynda jabyq keńistik jasaımyz. Qunarly orta retinde agar-agardy qoldanamyz. Aýany shyǵarý úshin kómirqyshqyl gazy bar agar-agar kómektesedi», - dep túsindirdi mektep oqýshysy. Maqsat joba jetekshisi, hımııa pániniń muǵalimi Marat Atabaevpen bıomassa quramynyń sapasy men sanyna qolaıly jaǵdaı jasaý jumystarymen aınalysýda.
