Qyzylordalyq 400-den astam oqýshy men stýdent oqýyn tastap ketken
QYZYLORDA. QazAqparat-Búgin Qyzylorda oblysynyń ákimi Qyrymbek Kósherbaevtyń tóraǵalyǵymen quqyq buzýshylyqtyń aldyn alý jónindegi vedomstvoaralyq komıssııanyń otyrysy ótti, dep habarlady QazAqparat HAA tilshisi.
Jıynda aldymen kámeletke tolmaǵandar men jastar arasyndaǵy quqyq buzýshylyq profılaktıkasy kún tártibine qoıyldy.
Aımaq basshysy óz sózinde el erteńi búgingi urpaq ekendigin, olardyń bolashaǵy úshin aǵa býyn jaýap beretindigin atap ótti. Ótken jyly oblys boıynsha qylmystylyq deńgeıi tómendegenimen, jasóspirimder qatysýymen bolǵan quqyq buzýshylyqtar sany artqan. Máselen, jyl basynan bergi eki aıdyń ózinde 25 paıyzǵa kóbeıip otyr. Buǵan birden-bir sebep - jastardyń qaraýsyz, tárbıeden tys ketýi. Aıtalyq, ótken jyly 400-den astam oqýshy men stýdent oqýyn tastap ketken. Olardyń búginde nemen aınalysyp jatqany belgisiz.
Q.Kósherbaev bul másele boıynsha kelesi otyrysqa deıin naqty is-shara jasaýdy tapsyrdy. Ásirese, oblystyq bilim basqarmasy basshysyna tárbıege baqylaýdy bosańsytpaýdy, balalar qylmysyna jol bergen bilim berý uıymdary basshylaryn qatań jazalaýdy talap etti.
