Qyzylordalyq 32 kásipker óz jobalaryn júzege asyrdy
QYZYLORDA. QazAqparat - «Damý - aımaqtar» shaǵyn jáne orta kásipkerlik sýbektilerin aımaqtyq qarjylandyrý baǵdarlamasy aıasynda ótken jyly qyzylordalyq 32 kásipkerdiń jobalary júzege asty.
Baǵdarlamanyń sátti jumys jasaýy nátıjesinde 175 jańa jumys orny ashyldy. Bul týraly «QazAqparat» HAA tilshisi «Damý» qoryna silteme jasap habarlady.
Búginde shaǵyn jáne orta kásipkerliktiń eń basty qajettiligi -qarjylandyrý ekeni belgili. Sondyqtan Qyzylorda oblysynyń ákimdigi men «Damý» qory birlesip, «Damý - aımaqtar» baǵdarlamasynyń júzege asýy úshin 1,5 mlrd. teńge qarajat bólgen bolatyn. Atalǵan baǵdarlama aıasynda aımaq kásipkerleri 8,5% ústememen 180 mln. teńgege deıingi nesıe qarajatyn ekinshi deńgeıli bankterden alýǵa bolatyn biregeı múmkindikke ıe boldy.
Eskere ketsek, oblys ákimdigi men Qor arasynda 2017 jyly yntymaqtastyqty jalǵastyrý týraly memorandýmǵa qol qoıylǵan bolatyn. Ústimizdegi jyly da «Damý - aımaqtar» baǵdarlamasy aıasynda kásipkerler úshin 180 mln. teńgege deıin jeńildetilgen nesıe qoljetimdi. Negizgi quraldardy qaıta jańǵyrtý maqsatyndaǵy nesıe 60 aıǵa deıin beriledi. Al aınalym qarajatyn toltyrýǵa 36 aıǵa deıin merzimge nesıe alý múmkindigi qarastyrylǵan. Nesıeni kepildendirý mólsheri jetispegen jaǵdaıda kásipkerler «Bıznestiń jol kartasy - 2020» bıznesti qoldaý men damytýdyń biryńǵaı baǵdarlamasy aıasyndaǵy bólshek kepildendirý quralyn paıdalana alady. Kepildendirý mólsheri áreket etýshi kásipkerler úshin - 50%, al bastaýysh kásipkerlerge nesıe somasynyń 85% quraıdy.
