Qyzylordalyq 30 polıtseı saltanatty túrde ant qabyldady
QYZYLORDA. QazAqparat-Qazaqstan polıtsııasynyń 25 jyldyǵyna oraı jáne «7 mamyr - Otan qorǵaýshy kúni» jáne «9 mamyr - Uly Jeńis kúni» merekeleri qarsańynda Memlekettik rámizder alleıasynda merekelik shara ótti, dep habarlady QazAqparat HAA tilshisi oblystyq ІІD silteme jasap.
Jıynǵa departament basshylyǵy, qyzmetkerleri jáne ishki ister organynyń ardagerleri qatysty.
Saltanatty shara Qazaqstan Respýblıkasy Gımnimen ashylyp, QR Іshki ister mınıstri polıtsııa general-polkovnıgi Q.Qasymovtyń quttyqtaýy oqyldy. Departament bastyǵy polıtsııa polkovnıgi Muhıtov Qaırat Bolatuly soǵys ardagerlerin, jalpy ishki ister organdary ardagerlerin qatar kelgen eki uly merekemen quttyqtap, soǵysta erlikpen qaza tapqan ár batyr atalarymyzdyń tarıh tórinen oryn alatyny jáne urpaqtary jeńis alaýyn sóndirmeı, Otan úshin otqa túsken esil erlerdi júrek túkpirinde ustaıtynyn erekshe atap ótti.
Shara barysynda Іshki ister mınıstrliginiń jáne departament bastyǵynyń marapattaý buıryǵy resmı túrde oqylyp, ishki ister organdarynyń ardagerleri men quqyqtyq tártip pen qaýipsizdikti qamtamasyz etýde erekshe kózge túsken departamenttiń birneshe qyzmetkeri marapattaldy.
Odan ári merekelik is-shara jas qyzmetkerlerdiń ant qabyldaý rásimine ulasty. Polıtsııa qyzmetine jańadan qabyldanǵan 30 polıtsııa qyzmetkeri qyzmetti adal jáne abyroımen atqarýǵa, Qazaqstan Respýblıkasy azamattarynyń quqyǵy men bostandyqtaryn qorǵaýǵa saltanatty túrde ant berdi.
Polıtsııa qyzmetine jańadan qosylǵan jas býyndy aıtýly kúnderimen Ardagerler keńesiniń tóraǵasy Tuńǵyshbaev Serikbol Qýatbaıuly quttyqtady. Ol ant qabyldaý - árbir polıtsııa qyzmetkeri úshin tolǵandyratyn saltanatty sát ekendigin atap ótip, óziniń qyzmetin, ómirlik jolyn halyqqa qyzmet etýmen baılanystyrǵan jas qyzmetkerlerdiń azamattyq boryshtaryn abyroımen atqarýlaryna tilektestik bildirdi.
