Qyzylordaǵy mektepterdiń jańa oqý jylyna daıyndyǵy máselesi qaraldy
Aldymen aımaq basshysy Álı Músilimov atyndaǵy №101 mektep-lıtseıinde oqý protsesine ázirlikke nazar aýdardy. Bilim oshaǵynda 230 pedagog qyzmet istese, olardyń 99 paıyzy koronavırýsqa qarsy ekpe alǵan. Qazir mektepte oqıtyn 2200-den asa oqýshynyń ata-anasyna ekpeniń mańyzdylyǵy, «Ashyq» qosymshasy týraly túsindirme jumystary júrgizilýde.
Bıyl mektepte 1 synypqa 258 bala qabyldanbaq. Olardyń qaýipsizdigi úshin «bir synyp, bir kabınet» júıesi saqtalǵan.
«Balalar dástúrli formatta mektepke kelip oqıdy. Sondyqtan olardyń karantın talaptaryn naqty oryndap, saqtyq sharalaryn saqtaýyna kóńil bólinýi tıis. Oqýshylar arasynda túsindirme jumystaryn kúsheıtý qajet. Al, árbir pedagog balalardyń densaýlyǵy úshin ekpeniń tolyq kýrsyn alýy mańyzdy» - dedi oblys ákimi.
Al Janábil Nurmanov atyndaǵy №198 orta mekteptiń negizi 1966 jyly qalanǵan. Munda 2000-nan asa oqýshy bilim alady. Ótken oqý jylynda 287 oqýshy dástúrli formatta, qalǵan 1875-i bilim alýshy onlaın formatta oqyǵan. Bıyl bul mektepte 1-synypqa 785 bala qabyldanady.
Oblys ortalyǵyndaǵy taǵy bir irgeli bilim ordasy S.Tolybekov atyndaǵy №3 mektep-lıtseıinde eki myńnan asa bala bilim alady. Ustazdar tolyqtaı ekpe saldyrǵan. Oqýshy sany kóp, sondyqtan olardyń úsh aýysymǵa oqý qaýpi týyndap tur. Buǵan baılanysty oblys ákimi Gúlshara Ábdiqalyqova bilim basqarmasynyń basshysy Aqzıra Qasymovaǵa atalǵan máseleni sheshý tetikterin qarastyrýdy jáne adam shoǵyryn shekteý úshin jańa oqý jylynda barlyq mektepterge «bir synyp – bir kabınet» júıesin qoldanýdy tapsyrdy.
Oqýdyń dástúrli formatta ótýine baılanysty barlyq mektepter «Ashyq» qosymshasyna qosylǵan. Sonymen birge, mektep oqýshylarynyń kúndelikti dene qyzýyn ólshenip, maskalyq rejımniń saqtalýy, kvartstaý, jeldetý, dezınfektsııalaý sharalaryn qatań saqtaýy tıis.
Aıta keteıik, aımaqtaǵy 177 196 oqýshynyń on paıyzy mektep tabaldyryǵyn alǵash attaıdy. ıAǵnı 18 myńnan asa oqýshy úshin «Álippe» men «Ana tili» oqýlyǵy beriledi.
Bilim oshaqtaryn aralaǵan oblys ákimi jańa oqý jylyna daıyndyq barysyn taǵy bir pysyqtap, sanıtarlyq-epıdemıologııalyq sharalardy tolyq baqylaýda ustap, qajetti qadamdardy ýaqytyly oryndaý qajet ekenin atap ótti.