Qyzylordaǵa bıyl 92 jańa qoǵamdyq kólik alynady (FOTO)
QYZYLORDA. QazAqparat - Qyzylordada 10 jańa avtobýs paıdalanýǵa berildi. Bul kólikter №18 baǵytta halyqqa qyzmet kórsetedi, dep habarlaıdy oblys ákimdiginiń baspasóz qyzmeti.
Bıyl Eýropalyq qaıta qurý jáne damý banki arqyly Qyzylordaǵa 92 jańa avtobýs keledi. Qoǵamdyq kólikterdiń endigi qalǵany jaqyn arada jetkiziletin bolady.
Sońǵy úlgidegi jańa qoǵamdyq kólikter suranysqa saı. Іshi keń ári jaıly. Syıymdylyǵy 78 adamdy tasymaldaýǵa deıin jetedi. Múmkindigi shekteýli adamdar úshin qolaıly jaǵdaı jasalǵan.
Bul oblys ákimdigi men «Baıqońyr» áleýmettik-kásipkerlik korporatsııasy jáne «Eýropalyq qaıta qurý jáne damý» banki arasyndaǵy kelisimge sáıkes júzege asyp otyr.
Avtobýstardyń barlyǵy keshendi tehnıkalyq tekserýden ótken. Oblys ortalyǵyndaǵy joldarda júrýge óte yńǵaıly. Aıta keteıik, avtobýs ekologııalyq taza otyn, gazben júredi. Ol úshin arnaıy gaz quıý beketi salyndy. Jolaýshylarǵa qyzmet kórsetýshiler biryńǵaı kıim kıedi. Bastysy, qyzmet kórsetýshilerdiń mádenıettiligi eskerilgen. Sondaı-aq, avtobýstarǵa GPS ornatylyp, araqashyqtyqtyń saqtalýy qatań baqylanady. Jańa qoǵamdyq kólikterdiń barlyǵynda beınekamera bar.
Búginde oblys ortalyǵynda 31 baǵytta 700-den astam qoǵamdyq kólik qyzmet kórsetedi. Jańa avtobýstar kishi syıymdylyqtaǵy kólikterdiń sanyn azaıtyp, qoǵamdyq transport máselesin sheshýge múmkindik beredi. 
