Qyzylordadan Oraldaǵy túrmege esirtki jetkizbek bolǵan qylmystyq top ustaldy
BQO boıynsha qylmystyq-atqarý júıesi departamenti málim etkenindeı, esirtki Qyzylordadan batys óńirlerge tasymaldanǵan.
Kúdiktilerden ustalǵan kezde 10 kg esirtki tárkilendi. Taǵy 5 kg esirtki olar turatyn mekenjaıdan tabyldy. Saraptama qorytyndysyna sáıkes esirtki keptirilgen marıhýana bolyp shyqty. Bul asa iri kólemdegi esirtki bolyp tabylady.
BQO boıynsha qylmystyq-atqarý júıesi departamenti bastyǵynyń orynbasary, ádilet polkovnıgi Nııaz Ryspaevtyń aıtýynsha, jedel aldyn alý sharalary barysynda Oralda jazasyn ótep jatqan er adamnyń óziniń inisi arqyly BQO-ǵa Qyzylordadan esirtki tasymaldaýǵa qatysy barlyǵy jóninde aqparat alynǵan. Esirtkiniń bir bóligin qylmystyq top túrmege jetkizbek bolǵan.
«Aqparat muqııat tekserilip, QR UQK departamentine berildi.
UQK departamenti qyzmetkerleri Aqtóbe qalasynda N. degen kúdiktini qolǵa túsirdi. Ol Oralda esirtki qylmysyna qatysty jazasyn ótep jatqan er adamnyń uly bolyp shyqty. Atalǵan jazasyn óteýshi zańsyz áreketinen sabaq alýdyń ornyna qylmysqa balasyn tartqan. Qazirgi kezde tergeý aıaqtalyp, is sotqa joldandy», dedi N.Ryspaev.
Eske sala keteıik, budan buryn Oralda Taraz turǵyny 21 kg esirtkimen ustalǵanyn jazǵan bolatynbyz.
Sondaı-aq BQO-nyń úsh turǵyny 800-den astam kıik múıizimen qolǵa tústi.
