Qyzylordadan Qaraǵandy oblysyna deıingi aralyqta jol jabyldy
QYZYLORDA. QazAqparat - Qyzylorda qalasynan Qaraǵandy oblysyna deıingi aralyqta kólik quralynyń qozǵalysyna shekteý qoıyldy.
Oǵan aımaqta aýa raıynyń qolaısyzdyǵy sebep bolyp otyr, dep habarlaıdy QazAqparat tilshisi Qyzylorda oblystyq tótenshe jaǵdaılar departamentine silteme jasap.
Atalmysh shekteý 29 qańtar kúngi saǵat 19.00-den bastaldy. Oǵan joldy qar basýy men boran soǵýy sebep bolyp otyr.
«Respýblıkalyq mańyzy bar «Qyzylorda-Pavlodar-Ýspenka-RF shekarasy» avtomobıl jolynyń 12-216 shaqyrymy aralyǵyna barlyq kólik quraldarynyń qozǵalysyna tyıym salynǵan. Bul Qyzylorda qalasynan bastap Qaraǵandy oblysynyń shekarasy deıingi aralyqty qamtıdy», - dep habarlaıdy Qyzylorda oblystyq tótenshe jaǵdaılar departamenti.
Osyǵan oraı «Qazavtojol» JShS Qyzylorda oblysy boıynsha fılıaly atalmysh baǵytta kólik qozǵalysyn shekteý týraly sheshim qabyldady.
Esterińizge sala ketelik, 28 qańtarda tıisti sala mamandarynyń jedel is-sharasy nátıjesinde osy baǵytta jolda qalyp qoıǵan «Astana-Qyzylorda» reıstik avtobýsy, 5 kishi syıymdylyqtaǵy avtobýs, 11 júk kóligi, 15 jeńil avtokólikte bolǵan jolaýshylar qutqarylǵan edi.
