Qyzylordadan Astanaǵa 270 tonna aýyl sharýashylyǵy ónimderi ákelindi
ASTANA. QazAqparat - Ótken demalys kúnderi Astanada Qyzylorda oblysynyń aýylsharýashylyq ónimderiniń jármeńkesi ótti, dep habarlaıdy QazAqparat.
Elordalyqtar úshin baý-baqsha jáne azyq-túlik ónimderiniń jármeńkesi eki kún qatarynan uıymdastyryldy jáne onda baǵalar naryqtaǵydan birneshe ese arzanǵa usynyldy.
Syr halqy jármeńkege jemis-jıdek, kókónis, balyq, et, kúrish, sút ónimderin, barlyǵy 270 tonna aýyl sharýashylyǵy ónimin alyp kelgen.
Elordalyqtardyń suranysyna ásirese, kúrish, qaýyn men qarbyz ıe boldy.
Qyzylorda oblystyq Aýyl sharýashylyǵy basqarmasynyń azyq-túlik qaýipsizdigin qamtamasyz etý bóliminiń basshysy Erhan Aǵybaıdyń aıtýynsha, jármeńkege 75 tonna kúrish, 7 tonna jylqy eti, 7 tonna sıyr eti, 3,5 tonna sút ónimderi, 1,25 tonna qymyz, 1,25 tonna shubat, 0,2 tonna ara baly, 6 tonna balyq, 0,5 tonna konfet, 20 tonna kókónis, qııar, qyzanaq, 6 tonna alma, almurt, órik, banan, 6 tonna kartop, 3 tonna sábiz, 15 tonna qyryqqabat, 1,5 tonna sók, talqan, 5 tonna as tuzy, 60 tonna qaýyn, 40 tonna qarbyz jáne basqa da ónim túrleri usynyldy.
