Qyzylordadaǵy jol apaty: Anasy da, balasy da tergelýde
ASTANA. QazAqparat - Qyzylordada kámeletke tolmaǵan jasóspirim kólikpen adam qaǵyp óltirdi. Osy oqıǵaǵa oraı sotqa deıingi tergeý amaldary júrgizilip jatyr, dep habarlaıdy QazAqparat tilshisi.
QR ІІM Іshki jáne syrtqy kommýnıkatsııalar departamentiniń dırektory Almas Sadýbaevtyń aıtýynsha, kámelettik jasqa tolmaǵan jasóspirim ótken jyldyń 28 jeltoqsan kúni Qyzylorda qalasynda jol apatyn jasap, jaıaý júrginshini qaǵyp ketken. Qazirgi ýaqytta sotqa deıingi tergeý amaldary júrgizilýde.
«Avtomobıl kináli tulǵanyń anasyna tıesili. Sol kúni ol ata-anasyna eskertpesten kólikpen qalaǵa shyǵyp ketip, jaıaý júrginshini qaqqan. Osydan keıin zardap shegýshini aýrýhanaǵa jetkizgen. Alaıda zardap shegýshi alǵan jaraqaty saldarynan osy jyldyń 1 qańtarynda qaza boldy. Jasóspirim óz kinásin tolyq moıyndap otyr jáne tergeý barysynda anasynyń qaraýyna jiberilgen», - dedi Almas Sadýbaev.
Sonymen qatar departament basshysy kólik ıesine qatysty da sotqa deıingi óndiris bastalǵanyn aıtty. ıAǵnı, jasóspirimniń anasy júrgizýshi kýáligi joq adamǵa kóligin júrgizýge bergeni úshin aıyptalyp otyr.
«Tergeý barysy Іshki ister mınıstrliginiń baqylaýynda», - dedi ol.
