Qyzylordadaǵy jemqorlyqqa qarsy marafon: Estafeta Qazaly aýdanyna berildi

QAZALY. QazAqparat - Qyzylorda oblysy Aral aýdanynda «Adal jol - chestnyı pýt» uranymen jemqorlyqqa qarsy marafon ótti. Sondaı-aq, marafon estafetasy kórshiles Qazaly aýdanyna berildi, dep habarlaıdy QazAqparat tilshisi.

Atalǵan shara «Sybaılas jemqorlyqqa qarsy kúres týraly» zańnamanyń qabyldanǵanyna 20 jyl tolýyna oraılastyrylyp otyr. Aral aýdany ákiminiń orynbasary Erkin Ábishevtiń aıtýynsha, marafonnyń basty maqsaty - memlekettiń jemqorlyqqa qarsy saıasatynyń tıimdiligin arttyrý, onyń kez kelgen kórinisine «múldem tózbeýshilik» ahýalyn jasaý arqyly sybaılas jemqorlyqqa qarsy qozǵalysqa búkil qoǵamdy tartý. Osyǵan baılanysty «Adal jol - chestnyı pýt» uranymen adaldyqty tý etken 20 avtokóliktiń kóshi Aral aýdanynda bolǵan edi. Endi atalǵan marafon kórshiles Qazaly aýdanynda jalǵasady.

«Sharaǵa memlekettik organ qyzmetshilerimen qatar, jastar, úkimettik emes uıymdar jáne qoǵamdyq uıym ókilderi belsene qatysyp otyr. Marafon aıasynda óńirde eki kúnnen beri qoǵamdyq-saıası mańyzy bar, sybaılas jemqorlyqqa qarsy mádenıetti qalyptastyrý baǵytynda túrli is-sharalar uıymdastyrylyp, araldyqtar respýblıkalyq aktsııaǵa óz úlesterin qosty. Minekeı, atalǵan estafeta týyn Qazaly aýdanyna usynǵaly turmyz», - degen ákim orynbasary adaldyqtyń aq týyn Qazaly aýdany ákiminiń apparat basshysy Nurǵısa Jalǵasbaevqa tabys etti.

Ortalyq alańda uıymdastyrylǵan sharada mektep oqýshylary «Jemqorlyqtan boıyn aýlaq ustaıtyn - adal urpaq adaldyqtyń bastaýy» dep urandatyp, belsendi jastar fleshmob ótkizdi.