Qyzylordadaǵy tóbeles: Іnisine jaqtasqan stýdent oqýshyny soqqyǵa jyqqan

QYZYLORDA. QazAqparat - Qyzylorda qalasynda 10 sáýirde tóbelesip, jaraqatymen aýrýhanaǵa jetkizilgen jasóspirimge qatysty oqıǵanyń mán-jaıy anyqtaldy, dep habarlaıdy QazAqparat tilshisi.

Oqıǵa 10 sáýir saǵat 17:35 shamasynda oblys ortalyǵynda bolǵan.

Polıtsııaǵa qala aýmaǵyndaǵy kópqabatty úılerdiń biriniń aýlasynda eki jasóspirim arasyndaǵy tóbeles týraly habar túsken.

Oqıǵaǵa baılanysty Qyzylorda qalalyq bilim bólimi tómendegishe túsinik berdi.

«Oblys ortalyǵynda ornalasqan «Aqmeshit» shaǵynaýdanynda №136 mektep-lıtseıiniń 8-synyp oqýshysy men №9 mektep-gımnazııasynyń 9-synyp oqýshysy arasynda eregis týyndaǵan. «Orda» kolledjiniń stýdenti №136 mektepte oqıtyn inisine jaqtasyp jaraqat alǵan jasóspirimge álimjettik kórsetken», - dep jazylǵan habarlamada.

Eske sala keteıik, 6 sáýirde Qyzylorda oblysy Qazaly aýdanynda eki mekteptiń oqýshylary arasynda janjal týyndaǵan bolatyn.

Oǵan baılanysty QR Qylmystyq kodekstiń 293-babyna sáıkes tergeý amaldary júrip jatyr.

Qazalyda oqýshyny uryp-soǵý oqıǵasyna baılanysty polıtsııa bastyǵy qyzmetinen alynady.